Embaixadór Indonesia iha Timor-Leste, Sahat Sitorus. Imajen TATOLI/Francisco Sony

DILI, 24 setembru 2021 (TATOLI)–Governu Indonézia liuhosi Embaixada iha Timor-Leste hatudu kompromisu kontinua apoia Ministériu Agrikultura no Peska (MAP) hodi fasilita formasaun kona-ba revitalizasaun nuu ba joven agrikultór.

“Governu Indonézia liuhosi Balai Penelitian Tanaman Palma (BalitPalma) iha Manado, Sulawesi Norte, hanesan sentru nuu sei kontinua fó formasaun ba timor-oan sira ne’ebé moris ho kuda nuu liuliu iha munisípiu Viqueque, Lautém, Suai no Baucau,” Embaixadór Indonézia ba Timor-Leste, Sahat Sitorus, hateten, hafoin sorumutuk ho Primeiru Ministru, Taur Matan Ruak, iha Rezidénsia Ofisiál Farol, sesta ne’e.

Notísia relevante: Posibilidade revitalizasaun nuu ektare 100 iha Viqueque lansa iha agostu

Sentru nuu iha Sulawesi Norte sei kontinua fasilita formasaun kona-ba siénsia no teknolojia  atubele iha esperiénsia kuda nuu badak  atubele prodús mina-nuu virjen.

“Sesta ne’e, Ha’u sei arranka ba munisípiu Viqueque hodi haree plantasaun nuu tanba Indonézia komprometidu apoia Timor-Leste iha área refere, hodi bele fó rendimentu ba komunidade liuhosi produsaun mina nuu virjen,” Diplomata ne’e akresenta.

Embaixadór Sahat Sitorus, dehan maski  nia mandatu ramata ona, maibé sei husu ba Embaixadór foun atu kontinua planu hodi hametin kooperasaun bilaterál entre nasaun viziñu ne’e.

“Ha’u hato’o ba Primeiru-Ministru katak ami prontu apoia Timor-Leste atu buka investidór atu investe setór ekonomia, turizmu no agrikultura nian,” nia kompromete.

BalitPalma fasilita ona formasaun  liuhosi via virtuál  hodi fahe esperiénsia ba joven agrikultór iha munisípiu Viqueque atu halo revitalizasaun nuu ektare 100 ho modelu agrikultura integradu.

Atividade ne’e partisipa hosi formandu hamutuk kuaze na’in-20, hanesan antigu alunu timor-oan ne’ebé antes ne’e hasai kursu agrikultór iha Israel.

Jornalista :  Antónia Gusmão

Editora     :  Julia Chatarina

HAKEREK NO HATÁN

Please enter your comment!
Please enter your name here