iklan

EKONOMIA, HEADLINE

Posibilidade revitalizasaun nuu ektare 100 iha Viqueque lansa iha agostu

Posibilidade revitalizasaun nuu ektare 100 iha Viqueque lansa iha agostu

Revitalizasaun nuu. Imajen/Espesiál

DILI, 22 juñu 2021 (TATOLI)—Diretór Nasionál Agro-Komérsiu no Kooperasaun Setór Privadu hosi Ministériu Agrikultura no Peska (MAP), Fernando Egidio Amaral, hateten, daudaun ne’e parte ministériu prepara hela kondisaun ba planu revitalizasaun nuu iha rai ektare 100 iha munisípiu Viqueque.

“Ha’u hanoin kuandu buat hotu rezolvidu, projetu sei lansa ona iha fulan-agostu nia laran,” Diretór ne’e dehan ba Agência TATOLI, iha ninia knaar fatin, edifísiu MAP, Comoro, tersa ne’e.

Rai ne’ebé tama área revitalizasaun, hosi tempu okupasaun portugés to’o indonéziu no agora hanesan propriedade Estadu.

“Entaun legalmente rai ne’e responsablidade Ministériu Justisa, tanba ne’e tenke halo prosesu entrega hosi Ministériu Justisa (MJ) ba Ministériu Agrikultura no Peska, entaun prosesu ne’e la’o no tama ona prosesu legál atu entrega,” nia haktuir.

Hafoin MJ entrega rai ba MAP, sei halo  sosializasaun ba autoridade lokál no komunidade kona-ba benefísiu programa iha suku sira-ne’ebé tama área projetu revitalizasaun nuu.

“Iha jullu nia laran sosializasaun la’o ona, ami sei halo iha loron haat ho komunidade ne’ebé besik liu ba implementasaun projetu revitalizasaun no loron tolu hamutuk ho administradór munisípiu, administradór postu inklui xefe suku sira,” nia hatutan.

Kona-ba orsamentu ba projetu revitalizasaun nuu, parte diresaun relevante iha MAP halo ona proposta hodi aumeta osan.

“Ha’u hanoin osan ba verba ne’e ami halo ona proposta no submete ba Gabinete Ministru hodi husu aumentu, espera bele hetan aprovasaun,” nia tenik.

Jornalista : Natalino Costa

Editora     : Julia Chatarina

iklan
iklan

Leave a Reply

iklan
error: Content is protected !!