Primeiru-Ministru, Taur Matan Ruak, hala'o enkontru ho Embaixadór Indonézia iha Timor-Leste, Sahat Sitorus, iha Rezidénsia Ofisiál Farol, sesta (24/09). Imajen TATOLI/Francisco Sony

DILI, 24 setembru 2021 (TATOLI)–Governu Indonézia liuhosi Embaixadór iha Timor-Leste, Sahat Sitorus, konsidera desizaun Governu Timor-Leste atu destaka FALINTIL-Forsa Defeza Timor-Leste (F-FDTL) iha fronteira, hafasil liután seguransa rai rua hodi kontrola di’ak liután pasajen ilegál.

“Planu atu monta F-FDTL iha fronteira terrestre laiha problema, ba ha’u nu’udar embaixadór haree, planu ne’e di’ak no bele hafasil liután koordenasaun entre Unidade Patrullamentu Fronteira (UPF) no Tentara Nasional Indonesia (TNI),” Embaixadór Sahat Sitorus hateten hafoin hasoru malu ho Primeiru-Ministru (PM), Taur Matan Ruak, iha Rezidénsia Ofisiál, Farol, sesta ne’e.

Notísia relevante: Pasajen ilegál fronteira, ema na’in 420 submete ba MP

Embaixadór ne’e dehan, koordenasaun ne’e importante tebes nune’e bele hasa’e volume seguransa iha fronteira di’ak liután.

“Iha asuntu barak ne’ebé ha’u ho Primeiru-Ministru diskute, ne’ebé asuntu sira ne’e importante tebes. Asuntu dahuluk maka kona-ba seguransa iha fronteira terrestre ne’ebé ami hala’o ona iha nível a’as, maibé nafatin atu tau atensaun liután ligadu ho kazu ilegál sira,” nia akresenta.

Diplomata Indonéziu ne’e espera pasajen ilegál via fronteira terrestre labele akontese tan ona no servisu migrasaun nasaun rua ne’e bele hala’o ninia serbisu no ema hirak ne’ebé prátika aktu ilegál ne’e presiza fó sansaun ne’ebé maka’as tebes, tanba bainhira aplika sansaun kama’an maka sira sei kontinua.

Notísia relevante: MD-PNTL deskuti kolokasaun F-FDTL iha fronteira

Embaixadór mós husu serbisu kolaborasaun tenke kontinua no presiza apoia maka’as hosi Polísia Nasionál Timor-Leste (PNTL), UPF no TNI hodi koordena no hala’o seguransa iha área fronteira sira.

Sahat Sitorus sujere atu buka maneira ida hodi kontrola di’ak liután pasajen ilegál no tenke apoia fasilidade hanesan kámara drone, hodi nune’e bele fasilita liután serbisu seguransa.

“Ha’u haree distánsia fronteira ne’e defisil bainhira ema na’in-500 de’it maka kontrola. Tanba ne’e maka presiza serbisu hamutuk entre parte rua no halo sosializasaun maka’as liu ba populasaun sira iha área fronteira, nune’e bele hatene liután risku bainhira atu hakat fronteira liuliu lori moras COVID-19 no aimoruk sira ne’ebé Governu bandu,” nia hatutan.

Antes ne’e, PNTL konklui ona identifikasaun ba timor-oan na’in-250 ne’ebé deporta hosi Autoridade Indonézia tanba hakat ilegál bá Atambua, nune’e faze tuir mai sei submete ba Ministériu Públiku (MP), maibé antes ne’e sei kumpre kuarentena durante loron-14.

Autoridade Indonézia deporta mós timor-oan hamutuk na’in-719, kompostu hosi mane 689 no feto 39, ne’ebé hakat ilegál via fronteira terrestre bá Atambua, ne’ebé submete ona ba kuarentena no identifikasaun.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here