Ministru Defeza, Filomeno da Paixão de Jesus. Imajen Tatoli/Francisco Sony.

DILI, 01 setembru 2021 (TATOLI)—Ministériu Defeza (MD), hamutuk ho Polísia  Nasionál Timor-Leste (PNTL), hala’o hela diskusaun kona-bá kolokasaun FALINTIL-Forsa Defeza Timor-Leste (F-FDTL), iha fronteira terreste, bazeia ba orientasaun Primeiru Ministru (PM) no Ministru Interiór (MI), Taur Matan Ruak.

“Primeiru Ministru fó órden mai ami, no daudaun ami tuur hamutuk ho PNTL atu halo konseitu  ne’ebé sei aprezenta ba Konsellu Ministru ba mekanizmu kolokasaun forsa iha fronteira,’’ Ministru Defeza, Filomeno da Paixão de Jesus, hateten ba jornalista-sira iha edifísiu Ministériu Finansa (MF), Aitarak Laran, kuarta ne’e.

Notísia relevante:PM hakarak koloka Forsa Armada iha fronteira terrestre

Tuir nia, militár mak iha lideransa ne’ebé preparadu liu ba iha fronteira, tanba tuir kursu kompletu hanesan soldadu, sarjentu, alferis, kapitais, majór, tenente koronél to’o jenerál.

Governante ne’e, lakohi adianta uluk bainhira mak militár bele koloka iha fronteira hodi troka PNTL liu hosi  Unidade Polísia Fronteira  (UPF) tanba daudaun sei iha  prosesu diskusaun.

Antes ne’e, Xefe Governu, Taur Matan Ruak, deklara konkorda tenke koloka fila-fali forsa armada atu asegura fronteira Terrestre hodi kombate movimentu ilegál.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here