Autoridade Munisipál Bobonaro, ekipa Task Force, hala’o enkontru koordensaun ho ekipa liña frente ba planu hasa’e kobertura vasina kontra COVID-19, sesta (24/09/21). Imajen Tatoli/Sérgio da Cruz.

BOBONARO, 24 setembru 2021 (TATOLI)—Autoridade munisípiu Bobonaro, hamutuk ho ekipa Task Force munisipál, liña ministeriál no líder komunitáriu-sira, diskute preparasaun koordenasaun konsellu serbisu, hodi hasa’e kobertura vasinasaun kontra COVID-19, doze dahuluk no daruak ba populasaun elijível.

Ekipa Task Force establese programa ne’e, tanba hetan orientasaun bazeia ba polítika hosi Ministériu Saúde (MS), tanba persentajen vasinasaun COVID-19 iha terriotóriu nasionál, Bobonaro okupa kuartu lugár hanesan númeru partisipasaun ne’ebé kiik liu hosi munisípiu sia.

Notísia relevante:Autoridade Bobonaro enkoraza populasaun Lolotoe simu vasina

“Durante semana 10 nia laran ita nia atinjimentu kobertura vasina ne’e bele to’o alvu katak, populasaun idade 18 ba leten ho komorbilidade teke simu vasina doze kompletu,” Diretór Serbisu Saúde Munisipál Bobonaro, João Barreto Cardoso, hateten iha salaun Kámara Dioseze Maliana, suku Lahomea, sesta ne’e.

Nune’e mós Sekretáriu Autoridade Munisipál Bobonaro, Júlio Carvalho Caero, hateten atu aselera programa ne’e, presiza liu maka kontribuisaun hosi autoridade lokál.

Parte autoridade haree katak, persentajen vasinasaun iha Bobonaro menus, tanba kauza hosi informasaun hoax ne’ebé ema irresponsável sira lansa iha komunidade nia leet.

“Entaun presiza Xefe suku-sira serbisu makás, hodi konsola komunidade bele mai simu vasina,” nia hateten.

Vise koordenadór Task Force, munisípiu Bobonaro, Superintendente, Antoninho Mauluta, enkoraza ekipa liña frente, esforsu makás salva povu.

Nia mós agradese tebes ba ekipa ne’ebé durante ne’e serbisu makás tebes, maibé tenke esforsu liu tán atu bele alkansa objetivu, katak populasaun Bobonaro tenke simu hotu vasina, nune’e bele prevene aan hosi moras ne’e.

Kona-bá  ne’e, Xefe suku Lour, Miguel Lopes Gomes, promete sei mobiliza komunidade atu partisipa iha programa Governu ne’e, maibé pesoál saúde tenke halo esplikasaun detallu kona-bá importánsia hosi vasina ne’e.

Desde implementasaun programa vasinasaun iha Munisípiu Bobonaro, hosi 09 abril to’o 17 setembru 2021, iha postu administrativu Maliana alvu 17.236 primeira doze 7.053 no segunda doze 2.584 ho 63,3%.

Tuir kedan postu administratrativu Balibo, alvu 9.233, simu primeira doze hamutuk 4.334 no segunda doze 1.237 ho totál 53,5%.

Postu administrativu Atabae alvu 6.100, simu ona doze dahuluk 3.265 no doze daruka 1.006 ho totál 46,9%.

Postu administrativu Cailaco populasaun alvu 5.368, simu doze dahuluk hamutuk 2.625 no doze kompleta 585 ho totál 46,2%.

Postu administrativu Loloto’e populasaun alvu 4.048, simu ona doze dahuluk hamutuk 2.573 no doze kompletu 664, totál 42,1%.

Ikus liu postu administrativu Bobonaro ho nia totál suku 18, maibé populasaun hamutuk 2.228 foin simu doze dahuluk no doze kompletu 290, ho nia persentajen 31,6%.

Dadus ne’e rekolla hosi totál postu vasinasaun hamutuk 219 no sub estasaun hamutuk 557, ne’ebé estabelese iha munisípiu Bobonaro.

Atu hasa’e kobertura vasinasaun ba doze dahuluk no segunda hosi loron 23 setembru to’o 30 novembru, daudaun ne’e ekipa Task Force prepara ona planu mikro, populasaun tarjetu iha fulan setembru sei simu vasina hamutuk 3.149 doze primeira no doze kompletu 2.167.

Fulan outubru 15.000, doze daruak 15.433 no fulan novembru 15.000 doze dahuluk no doze kompletu 417 ne’ebé multiplika ba totál doze primeiru 33.149 no doze kompletu 18.017.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here