Sekretáriu Autoridade munisipál Bobonaro, Júlio Carvalho Caero. Imajen Tatoli.

BOBONARO, 22 setembru 2021 (TATOLI)—Sekretáriu Autoridade munisipál Bobonaro, Júlio Carvalho Caero, enkoraza komunidade postu administrativu Lolotoe, atu partisipa másima iha programa vasinasaun, nune’e bele aumenta imunidade isin luta kontra COVID-19.

“Ita iha munisípiu Bobonaro ne’e persentanjen vasina sei kiik liu, foin mak 40%. Ha’u husu autoridade lokál, komunidade tomak mai simu vasina,” Júlio Carvalho Caero, hateten iha serimónia pose ba membru KPK 105, iha Lolotoe Vila, kuarta ne’e.

Notísia relevante:MD kontinua enkoraja populasaun Bobonaro simu vasina

Nia husu liuliu ba autoridade lokál sira atu esforsu makás hodi konsola komunidade bele partisipa ativu iha programa Governu ne’e, tanba munisípiu Bobonaro fronteira kedan ho Indonezia ne’ebé fásil atu moras ne’e halo transmisaun.

Iha fatin hanesan, komunidade Martinho Barreto, rekoñese seidauk simu vasina, tanba tauk ho informasaun ne’ebé durante ne’e espalla iha média sosiál katak, vasina ne’e lori perigu ba ema nia vida.

“Hau vasina dala ida de’it mós seidauk, tanba ami povu beik ne’e ema dehan vasina agora ita mate, entaun ami fiar de’it ona,” nia deklara.

Maski nune’e nia promete sei simu vasina, maibé pesoál saúde tenke esplika no halo sensiblizasaun kle’an kona-bá importánsia hosi vasina ne’e.

Xefe Suku Guda, Caetano Fransisco, promete sei eforsu fahe informasaun ba komunidade, nune’e bele bele mai simu vasina kompletu.

Postu administrativu Lolotoe iha suku hitu ho populasaun hamutuk 8.553, hosi númeru ne’e populasaun ho idade 18 ba leten no komorbilidade alvu atu simu vasina hamutuk 4.408.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here