Natar iha Atabae. Imajen TATOLI/António Gonçalves

DILI, 23 setembru 2021 (TATOLI)–Ministru Agrikultura no Peska, Pedro dos Reis, informa, parte ministériu prepara mobiliza ekipamentu pezadu sira ba munisípiu sira atu destaka iha sistema irrigasaun, nune’e bele asegura natar bainhira akontese fenómenu La Niña.

“Daudaun, ami prepara hela ami-nia ekipamentu atu destaka iha sistema irrigasaun manuál sira atubele asegura natar bainhira udan-monu rai ho velosidade boot liu ka fenómenu La Niña akontese karik, agrikultór kontinua halo natar,” Ministru Pedro hateten iha Palásiu Governu, kinta ne’e.

Antes ne’e, Meteorolojia Austrália no internasionál alerta ona katak iha posibilidade Timor-Leste hetan impaktu hosi fenómenu ne’e.

“Ami preparadu, maski ekipamentu ladún sufisiente atu halo atuasaun ba predisaun fenómenu naturál ne’e, nune’e povu agrikultór kontinua halo produsaun ai-han,” nia akresenta.

MAP iha ona esperénsia rezolve no rekupera sistema irrigasaun sira, ne’ebé hetan estragu kauza hosi dezastre naturál ne’ebé akontese iha loron 04 abríl.

“Estragu tanba inundasaun iha abríl, hamosu situasaun defisil, maibé ministériu ne’e tun ba terrenu no halo esforsu hodi salva natar no povu agrikultór konsege kolleta hare ba époka daruak ona,” nia akresenta.

Notísa relevante: MAP hahú identifika natar no irrigasaun hetan estragu dezastre naturál

Daudaun ne’e, Governu hetan ona apoiu hosi Japaun atu normaliza no hasai sedimentasaun hosi sistema irrigasaun.

Fenómenu La Niña nu’udar eventu klimátika ida ho kondisaun anomalia ho temperatura laloran tasi boot iha Oseanu Pasífiku no aumenta mudansa iha sirkulasaun atmósfera, ne’ebé hamosu anin no udan boot.

Jornalista : Florêncio Miranda Ximenes

Editora      : Julia Chatarina 

HAKEREK NO HATÁN

Please enter your comment!
Please enter your name here