Ministru Agrikultura no Peska, Pedro Reis. Imajen Tatoli/Egas Cristovão

DILI, 08 abríl 2021 (TATOLI)Governu liuhosi Ministériu Agrikultura no Peska (MAP) fó ona instrusaun ba Diretór Agrikultura no Estenxionista munisipál sira atu halo identifikasaun ba natar no sistema irrigasaun ne’ebé hetan estragu kauza hosi dezastre naturál ne’ebé akontese iha domingu (04/04) kuaze iha territóriu tomak.

“Mota kuaze sobu ita-nia skema irrigasaun no lori sedimentasaun taka kanu sira inklui estraga povu agrikultór nia natar, nune’e haruka ona ba Diretór Munisipál sira atu halo identifikasaun hodi fó intervesaun,” Ministru Agrikultura no Peska, Pedro Reis, hateten ba Agência TATOLI, iha ninia knaar fatin, Comoro, Dili, kinta ne’e.

Notísia relevante:Tinan oin, MAP sei hadi’a irrigasaun ualu

Udan no anin boot iha loron rua tutuir malu iha parte Kosta Súl no Leste, provoka inundasaun no halo povu agrikultór sira hetan impkatu maka’as, tanba ne’e ne’e Governu liuhosi MAP komunika ona ba setór privadu atu ajuda rezolve problema hirak ne’e.

Ministru Pedro informa kanál irrigasaun hanesan Larisula Manufahi, Karau-ulun, Webaba no Suia Kasa ektare 300, Kailaku inklui Manatuto, kuaze natar lubuk ida no kanál irrigasaun, ne’ebé sedimentasaun sa’e maka’as no bee tama hotu natár laran.

Maski nune’e, kanál irrigasaun iha Maliana II ho natar kuaze ektare 1.500, ne’ebé tinan kotuk MAP halo intervensaun maibé iha inundasaun foin lalais ne’e la fo impkatu.

“Ami-nia ekipa tun direita ona hodi komunika ho setór privadu sira atu halo atedimentu, hodi hasai sedimentasaun no halo normalizasaun urjente tanba kuaze fatin hotu-hotu hetan estragu,” nia akresenta.

Ministru dehan, ekipa tékniku sira seidauk bele desloka ba terrenu tanba maioria operadór hela iha Dili no hela iha bairru ne’ebé afetadu ba maka’as COVID-19.

Tuir nia, povu agrikultór balun iha époka dahuluk iha dalan klaran, kuda hela, balun ko’a ona no futu iha natar laran ne’ebé la konsege hasai bee tama no estraga.

“Ita-nia ema balun atu kuda no balun kuda hotu ona inklui iha Kailaku iha balun ne’ebé ko’a daudaun ona no futu hela, maibé seidauk konsege lori sai tanba inundasaun tama estraga,” nia informa.

Daudaun ne’e, MAP halo intervesaun liuhosi komunikasaun ba empreza sira iha área afetadu sira atu ajuda povu sira ke’e bee dalan no hasai sedimentasaun atu normaliza hodi hein intervesaun no apoiu hosi Governu.

Jornalista: Florêncio Miranda Ximenes

Editoa: Julia Chatarina

HAKEREK NO HATÁN

Please enter your comment!
Please enter your name here