Diretór Fundasaun Ahisaun, Domingos dos Santos. Imajen TATOLI/Nelia Fernandes.

DILI, 23 setembru 2021 (TATOLI)—Diretór Fundasaun Ahisaun, Domingos dos Santos, informa durante situasaun serka sanitária, Fundasaun Ahisaun fó apoiu umanitáriu ba ema ho defisiénsia fiziku hamutuk 200-resin.

“Iha situasaun serka sanitária fulan jullu ne’e, ami halo asaun karidade hodi fó apoiu umanitáriu ba itania maluk defisiénsia fiziku hamutuk 200-resin iha munisípiu Bobonaro no Ermera,” Domingos dos Santos hateten ba Agência Tatoli, iha nia knaarfatin, Dili, kinta ne’e.

Asaun karidade ne’ebé Fundasaun Ahisaun halo ne’e, konkretamente fó apoia nesesidade báziku hanesan foos, susu-been, mina, masin midar, supermie, máskara no hand sanitázer ba ema ho defisiénsia sira-ne’ebé mak susar tebes hetan ai-han no hahan iha situasaun estadu emerjénsia nia laran ne’e.

“Ita-nia maluk defisiénsia sira hosi Dili ba halo asaun karidade, hodi fó netik ai-han ba sira,” nia dehan.

Apoiu umanitáriu ne’ebé Fundasaun Ahisaun halo ne’e, tanba hetan apoiu fundu hosi Misaun Lepra TimorLeste ho totál $6,860.

Entretantu, dadus hosi Fundasaun Ahisaun hosi tinan 2020 to’o 2021 ne’e relata katak totál ema ho defisiénsia fiziku iha TimorLeste hamutuk 500.

Jornalista : Nelia Fernandes

Editór       : Cancio Ximenes

 

HAKEREK NO HATÁN

Please enter your comment!
Please enter your name here