Arguidu António da Conceição “Kalohan”, marka prezensa iha TDD, kinta (08/04/2021). Imajen Tatoli/Nelson de Sousa.

DILI, 23 setembru 2021 (TATOLI)—Tribunál Distritál Dili (TDD), kinta ne’e, hahú hala’o audiénsia julgamentu ba kazu ne’ebé deskonfia envolve atuál deputadu António da Conceição ‘Kalohan’, bainhira asume knaar Ministru Komérsiu Indústria no Ambiente (MKIA) iha 2014.

Tribunál notifika arguidu hamutuk na’in-lima hanesan António da Conceição no arguidu ho arguida inisiál ADC, JI, GPDS no PMDC.

Notísia relevante:TDD deside ona data julgamentu ba Deputadu António da Conceição

Tuir faktu akuzasaun hosi Ministériu Públiku (MP), ne’ebé Tribunál lee sai katak, iha  2014, arguidu ADC nu’udár  funsionáriu públiku no asume kargu hanesan Diretór Nasionál ba Industria no Transformadora, iha (MKIA), arguida JIB  funsionáriu  publiku no asume kargu Xefe Departamentu Lojístika Nasionál iha  Dirasaun Nasionál Aprovizionamentu no Lojistika MKIA.

Arguidu GPDSC hanesan funsionáriu públiku no asume kargu hanesan Diretór  Nasionál ba Aprovizionamentu, no Lojístika MKIA, arguidu PMDCSV Diretór kompañia Kninuk Star Unipessoal,Lda no arguidu António  da Conceção nu’udár Ministru MKIA.

Iha 2014, MKIA iha osan atu sosa outru ekipamentu diversu, hosi orsamentu kapitál menór ho montante globál $200.000, ne’ebé to’ofulan julu 2014, orsamentu refere seidauk ezekuta.

Nune’e ADC hanesan Diretór Nasionál ba Indústria no Transformadora, hosi Diresaun Nasional ba Indústria no Transformadora, dezenvolve proposta hodi sosa ekipamentu sira kona-bá test kids ba laboratóriu, ekipamentu atu halo teste ba ethanol no mós mákina pakotamentu ba kafé, inklui mákina atu sona kafé, sai nu’udár fasilidade iha sentru treinamentu iha Matadouru, hodi fo treinamentu ba empreza indústria kiik sira nomos treinamentu ba funsionáriu tékniku sira ne‘ebé atu implementa programa indústria no mákina kafé ne‘ebé atu fornese ba grupu produsaun kafé iha Aileu.

Iha 24 juñu 2014, diresaun finansa MKIA fikasa osan ho montante $200.000 iha CPV númeru 70840, ne‘ebé autoriza no sertifika autorizasaun ba pagamentu ho montante $191.000.

Liu tiha fulan ida iha  24 Jullu 2014, parte sira perpara kompra bo montante $200.000 no iha  04 Agostu 2014, Dirasaun Nasionál Aprovizionamentu, Lojístika no Materiál, hahú anunsia konkursu aprovizionamentu atu foti no submete dokumentu ITB kona-bá fornesimentu ekipamentu laboratóriu indústria, hosi kompañia sira ne’ebé hakarak atu sosa dokumentu tenderizasaun ba fornesimentu ekuipamentu sira, iha kompañia 16 mak partisipa hodi sosa dokumentu no iha kompañia hamutuk 11 mak partisipa iha enkontru fornesimentu dokumentu.

Tanba hosi MKIA seidauk entrega dokumentu espesifikasaun ba ekipamentu ne‘ebé atu fornese hosi kompañia sira ne’ebé sosa dokumentu tenderizasaun ne’e, maka iha 11 agostu 2014, Dirasaun Aprovizionamentu ho reprezntante kompañia sira hamutuk 11, halo fali akta konkordánsia atu prolonga tan tempu ba submisaun dokumentu fornesimentu ekipamentu laboratóriu to’o 18 agostu 2014.

Nune’e, totál kompañia hamutuk 15 mak konsege partisipa hodi sosa dokumentu ba tenderizasaun, maibé iha de’it kompañia rua hanesan kompañia Kaninuk Star no Maristi mak konsege fornese dokumentu refere, no tuir rezultadu membru avaliasaun tékniku iha MKIA, ne‘ebé kompostu hosi arguida JIB, arguidu ADC, GPC no membru sira seluk no aprovadu hosi arguidu António da Conceição , hodi fó-sai rezultadu katak, kompañia Kaninuk, hetan valór 98.6 no kompañia Maristi, hetan valór 91.51, nune’e, ekipa tékniku avaliasaun deside  katak, kompania Kaninuk, Unip, Lda mak sai nu’udár manan na’in ba projetu fornesimentu ekipamentu laboratóriu indústria.

Iha 26 setembru 2014, MKIA liu hosi Dirasaun Nasionál Aprovizionamentu, Lojístika  no Materiais (DNALM), arguidu GPC, selebra kontratu ho númeru RDTL-11419, ho arguidu P MDCSV nu’udár Diretór ba kompañia Kaninuk Star, Unip, Lda, ho valór $191.000 no hetan aprovasaun hosi arguidu António da Conceição.

Iha kondisaun espesiál hosi kontratu refere, mensiona kona-bá fatin no períudu fornesimentu ba ekipamentu sira ne’e mak iha lojístika armajen MKIA iha Dili, ho durasaun loron 60, hahú hosi 23 setembru to’o 23 novembru 2014.

Hafoin arguidu na’in-rua  asina tiha kontratu iha 26 setembru 2014, liu tiha fulan ida, iha 22 outubru 2014, mak parte sira hosi ministériu prepara fali órden kompra, ikus-mai hamosu númeru kontratu iha órden kompra la hanesan ho númeru kontratu iha kontratu refere.

Antes períudu deliberasaun ekuipamentu sira ne‘e atu remata iha 23 novembru 2014, arguidu Diretór ba Kompañia Kaninuk iha 11 novembru 2014, hato‘o karta justifikasaun ba arguidu  GPDSC  katak, kompañia seidauk bele fornese ekipamentu sira iha kontratu tanba stock iha distribuidór Indonézia laiha no presiza tempu atu hameno ba nasaun seluk, tanba ne‘e husu ba GPDSC atu foti desizaun.

Haree ba tempu atu fornese ekipamentu sira ne‘e liu ona semana rua, maka iha 12 dezembru 2014, arguidu halo karta deklarasaun ida katak, kompañia Kaninuk  seidauk konsege hatama ekipamentu tuir kontratu, ho razaun presiza tempu atu hameno, maibé kompañia nafatin iha komitmentu atu hatama tuir ninia espesifikasaun no prontu fornese duni.

Maski materiál laboratóriu indústria ne‘ebé fornese hosi kompañia Kaninuk Star iha 2015, maibé iha 12 dezembru 2014, arguida JIB  nu’udár Xefe Departamentu Lojístika prepara tiha formuláriu rejistu patrimóniu, no perpara relatóriu resevimentu no inspesaun (R&I), ne‘ebé aprova hosi GPDSC nune’e labele fó implikasaun ba ezekusaun orsamentu, no arguida orienta mós ba kompañia Kaninuk atu kompleta mós dokumentu sales contrat, livre order no invoice ho númeru seriál ekuipamentu sira-ne’e, nu’udár rekezitu hodi prosesa pagamentu.

Bazeia ba justifikasaun ne‘ebé arguidu sira halo, iha 18 dezembru 2014, tezouru  sentrál Ministériu Finansa (MF), realiza duni órden ba pagamentu ba kompañia Kaninuk Star, liu hosi Banku Mandiri ho númeru konta bankária  601-000058033-5, ho montante $ 191.000.

Maibé iha 16 dezembru 2014, GPDSC envés haruka karta kanselamentu ba Tezouru MF atu kansela prosesu pagamentu ne’e, maibé arguidu haruka fali karta ba Jenerál Manajér Banku Mandiri, Timor-Leste, hodi husu atu blokeia konta bankária  kompañia Kaninuk Star, Unip, Lda, ne‘ebé mak Seidauk  fornese mákina indústria no Laboratóriu mai MKIA ho montante $191.000.

Bainhira  kompañia Kaninuk Star lori ekuipamentu sira ne’e to’o mai iha fulan fevereiru 2015, la halo ona inspesaun, tanba inspesaun halo ona antes iha 12 dezembru 2014, hafoin simu tiha ekuipamentu sira ne’e GPDSC mak rejista direta ekipamentu  iha baze dadus patrimóniu no dokumentu hotu arguidu mak asina ho orientasaun ADC nu’udár Direitór Nasionál Indústria Transformadoras.

Kompañia Kaninuk Star konsege fornese duni mai iha MKIA, maibé sasan la mai kompletu dala ida de’it, tanba ekipamentu balun etanol no mákina kafé balun mai uluk iha fulan janeiru no fevereiru 2015.

Alende ne‘e, mákina double jacket ne‘ebé kompañia fornese ne‘e aat, nune’e ákina Etanol kompañia foin fornese iha fulan outubru no novembru 2017, iha unidade rua.

Ekipamentu sira ne’e mós tama la tuir tempu iha kontratu, maioria númeru seriál no tipu ne‘ebé la hanesan ho lista rejistu patrimóniu no deliver order (DO), ho ITB numeru RDTL-002/MCIA/2014 ho númeru 0004/K S/DO/12/2014.

Iha ekipamentu  laboratoriu ethanol  haat mak la rejista iha dokumentu  rejistu patrimóniu, mak hanesan test kit confote no test kit boracks (f-05), ho númeru seriál PFCTKEF 15051410 no PECI KF 15051411, mákina sona kafé ho tipu Steanlis 235 kg hamutuk ida ho númeru seriál SGR5012015, water test kit tipu inscienpro Eco-01, iha rua ho númeru scrial WITKM 1506014056 no WTKM 1506014058, slat ukur kadar air (pectrameter) tipu MC7825G, iha tolu ho númeru  scrial BGM 1405, BGM 1406, no BGM 1407.

Implikasaun hosi ekipamentu ne‘e tama la kompletu tuir tempu iha kontratu, númeru serial ne‘ebé la hanesan no tipu ne’ebé diferente, desde 2015 to’o agora la utiliza ekipamentu mákina kafé nomos ekipamentu  ethanol sira ne’e no rai de’it iha armajén laiha manutensaun.

Arguidu  ADC nu’udár Diretór Nasionál la responsabiliza ekipa tékniku ne‘ebé halo akompañamentu ba grupu indústria ida iha postu  administrativu Laclubar, deklara katak, responsabiliza ba ekipamentu ida naran Master Refractometer (Alkohol) ho presu $450, ne‘ebé lakon iha box to’o agora seidauk hetan.

Arguidu sira nia konduta refere iha autu hamosu prejuizu osan Estadu nian ho montante $143.500 tuir valór presu ne‘ebé deskreve iha kontratu, Orden Pagamentu (OP) no Deliver Order  (DO), ba ekipamentu ne‘ebé la konsege utiliza mak hanesan, Heat exchanger (tampaung modelu nakloke) unidade  ida ho presu $1.900, Double Jacket, unidade  ida ho presu $1.900, Packing Machine ZX series pic automatic, tolu ho presu kada unidade $23.500, sub totál  $70.500, mákina sona kafé, unidade  ida ho presu $7.000, water test kit, unidade rua ho presu kada unidade $18.600, sub totál $37.200, Alat ukur kadar alkohol (Refractometer wine arm 103), unidade rua ho presu kada unidade $450, sub totál $900, alat ukur kadar air (Spectrameter, Sm1701Bm no Mc7825G), unidade tolu ho presu kada unidade $750, sub totál $2.250, alat digital salt meter, unidade rua ho presu kada unidade $650, sub totál $1.300, Cooking Tank (Ss-304 Dof), unidade ualu ho presu kada unidade $2.000, sub totál $16.000, Heat Exchanger (tampaung modelu nakloke), unidade  ida ho presu $2.150, asesores, unidade ida ho presu $2.400, ho totál  $143.500.

ADC nu’udár Diretór Nasionál ba Indústria no Transformadora, iha MKIA, hatene katak, MKIA Iaiha tékniku kualifikadu ba ekipamentu ethanol, la halo estudu viabilidade antes atu halo planu ba sosa ekipamentu hirak-ne’e, maibé bazeia de’it ba espesifiksaun no asesu material sira ne‘e hosi internet, ne’ebé ikus mai prezudika kuantidade ba kustu nomos kualidade, hodi hetan no fo benefisiu ilejitimu ba kompañia Kaninuk Star, Unip Lda.

JIB  nu’udár Xefe Departamentu Lojístika no  arguidu GPC nu’udar Direitór Nasionál Aprovizionamentu, Lojístika  no Materiál, iha MKIA, hatene katak, kompañia Kaninuk Star, la konsege fornese mákina  nomos ekipamentu laboratóriu, maibé tanba atu garante ezekusaun orsamentu ne’ebé planeadu, maka JIB mak prepara lista rejistu patrimóniu nomos relatoriu R&I, no arguidu GPC mak halo aprovasaun nune’e bele halo prosesu pagamentu ba ekipamentu sira ne‘e maske realidade iha loron 12 dezembru 2014, ekipamentu sira nee hotu kompañia seidauk oferese mai iha MKIA.

Arguidu António da Conceição, Ministru MKIA halo aprovasaun ba CPV ho númeru 70840, iha 30 juñu 2014, no halo aprovasaun rekizasaun ba pagamentu iha 04 novembru 2014, ne‘ebé MF simu iha 24 novembru 2014, no ikus mai MF emiti duni TPO, iha 18 dezembru 2014, ho montante $191.000, maski iha realidade ekipamentu kompañia Kaninuk Star, unip Lda, seidauk fornese.

PMDCSV nu’udár Direitór ba kompañia Kaninuk Star, Unip Lda, asina kontratu ho MKIA ho montante global $191.000, ne’ebé ikus mai Tezoru MF halo pagamentu ho montante refere ba kompañia Kaninuk Star, maski iha realidade ekipamentu laboratóriu indústria foin fornese mai iha MKIA iha fevereiru 2015, fulan rua hafoin  halo tiha pagamentu.

MP akuza arguidu sira ho krime pekulatu iha artigu 295 númeru 1, ekonómika iha negósiu no administrasaun danosa, ne’ebé punidu iha artigu 299 númeru 2 no artigu 274 númeru 2, no burla agravadu ho falsifikasaun dokumentu iha kódigu penál.

Hatán ba akuzasaun sira ne’e arguidu ADC nu’udár Diretór Nasionál ba Industria no Tranformadora MKIA iha 2012 to’o 2016, hateten akuzusaun sira ne’e balun loos no balun nia parte hakarak halo esklaresimentu.

Iha 2014 Ministériu iha orsamentu anuál prevee duni rihun $200 atu sosa ekipamentu diversu hanesan Laboratóriu no mákina indústria kiik, maibé la determina loloos atu sosa saida-saida.

Iha prosesu ne’e nia parte iha koñesimentu tanba nia mak halo pedidu ba diresaun finansa no halo deskrisaun espesifikasaun ba ekipamentu tanba antes ne’e tuir formasaun durante fulan ida hosi parseiru internasionál.

Iha sala audiénsia julgamentu, ADC rekoñese mós katak, iha koñesimentu hodi  envolve no akompaña iha loron primeiru bainhira loke envelope kompañia sira ne’ebé tuir konkursu katak prosesu aprozionamentu la’o duni.

“Primeiru, asina  termu entrega ne’e ha’u laiha verifikasaun no ha’u hakfodak iha 2015 mak funsionáriu lori tan fali asina daruak termu entrega ba ekipamentu foin to’o, maibé seida’uk kompletu,” nia hateten.

Hafoin rona deklarsaun ADC to’o ona iha tuku 12:30, nune’e Tribunál deside suspende julgamentu ba fali iha parte lorokraik.

Audiénsia julgamentu ne’e prezide hosi juiz koletivu Ivan Suritai, Maria Solana, Ana Paula Fonseca no Ministériu Públiku repzenta hosi Prokuradór Rogerio Viegas no arguidu sira hetan asisténsia legál hosi advogadu privadu no defensór públiku.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here