Diretór CIGC Brigadeiru-Jenerál, João Miranda "Aluk Descartes". Imajen TATOLI/Francisco Sony

DILI, 23 setembru 2021 (TATOLI)—Koordenadór Sala Situasaun, Sentru Integradu Jestaun Krize (CIGC, sigla portugés), Brigadeiru Jenerál João Miranda ‘Aluk’, hasoru malu ho Primeiru-Ministru (PM), Taur Matan Ruak, hodi ko’alia kona-ba implementasaun estratejia liga ho COVID-19 iha Timor-Leste.

Iha biban ne’e, CIGC rekomenda ba Governu atu hakotu ona serka sanitária iha munisípiu Dili bainhira surtu COVID-19 iha Timor-Leste menus ona.

“Primeiru-Ministru husu situasaun atuál, maski ami halo aprezentasaun iha Konsellu Ministru horiseik, kona-ba situasaun jerál iha rai-laran kona-ba COVID-19, bele dehan katak la’o di’ak no númeru infetadu kontinua tun loron ba loron. Ami rua ko’alia hela provavelmente iha reuniaun Konsellu Ministru tuir mai, katak sé situasaun mantein ho nível agora, bele halo levantamentu serka sanitária iha Dili,” Koordenadór Sala Situasaun CIGC, informa, hafoin reuniaun ho Xefe Governu, iha Palásiu Governu, kinta ne’e.

Serka sanitária iha munisípiu Dili sei ramata iha tuku 23:59 loron 29 fulan-setembru.

Notísia relevante: Governu hakotu serka sanitária iha munisípiu tolu, mantein iha Dili

PM aseita ho rekomendasaun ne’e, ho kondisaun situasaun ne’e mantein nafatin ka tun liu mak bele hakotu serka sanitária.

Tuir Brigadeiru Jenerál, kona-ba funsionamentu Sala Situasaun CIGC, servisu la’o di’ak no kontinua kolabora hamutuk ho Ministériu Saúde hodi implementa medida prevensaun COVID-19.

“Medida prevensaun sira ne’ebé durante ne’e implementa dala ruma balun la’o di’ak, maibé balun ne’ebé ita hotu akompaña, kuandu mais ita insiste, ita-nia ema balun kala ho tempu ne’ebé naruk lakon ona pasiénsia, maibé hosi Sala Situasaun ami la lakon vontade, ami sempre tenta apela nafatin ba públiku atu kumpre regra sira ne’ebé Ministériu Saúde no Organizasaun Mundiál Saúde estabelese atu ita bele hadook-an hosi moras ne’e,” nia dehan.

Enkuantu, tuir dadus hosi CIGC, iha loron 22 setembru kazu pozitivu hamutuk 81, ativu 1.274, no totál óbitu 108.

Jornalista : Antónia Gusmão

Editora      : Julia Chatarina

HAKEREK NO HATÁN

Please enter your comment!
Please enter your name here