Primeiru Ministru, Taur Matan Ruak, prezide reuniaun Konsellu Ministru, iha Palásiu Governu, segunda (22/09). Imajen TATOLI/Francisco Sony

DILI, 22 setembru 2021 (TATOLI)–Governu liuhosi reuniaun Konsellu Ministru (KM) deside hodi hakotu imposizasaun serka sanitária iha munisípiu Baucau, Ermera no Covalima, ne’ebé sei ramata ohin loron iha tuku 23:59.

“Desizaun hirak ne’e Konsellu Ministru foti,  bazeia ba aprezentasaun hosi Sala Situasaun, Sentru Intergradu Jestaun Krize (CIGC, sigla portugés) no espesilizta saúde nian katak ita-nia situasaun pandemia ne’e hatudu sinál di’ak fali ona kompara ho semana hirak liubá,” Ministru Prezidénsia Konsellu Ministru, Fidelis Manuel Leite Magalães, relata, hafoin reuniaun ezekutivu, iha Palásiu Governu, kuarta ne’e.

Iha reuniaun ne’e, deside mós hodi mantein serka sanitária iha munisípiu Dili durante loron hitu tan.

“Konsellu Ministru aprova projetu Rezolusaun Governu nian, ne’ebé mantein impozisaun serka sanitária iha munisípiu Dili to’o tuku 23:59 loron 29 fulan-setembru,” Portavóz Governu ne’e subliña.

Ba períodu serka sanitária, Governu mantein proibisaun sirkulasaun ema entre munisípiu Dili no sirkunskrisaun administrativa sira-seluk, exetu iha kazu hirak ne’ebé iha fundamentu forte tanba razaun seguransa públika, saúde públika, asisténsia umanitária, manutensaun ba sistema abastesimentu públiku ka razaun seluk ne’ebé presiza atu hala’o ba interese públiku.

Maski nune’e, la inklui proibisaun sirkulasaun indivíduu sira ne’ebé komprova vasinasaun kompleta kontra COVID-19, no mós ba labarik sira ho idade tinan-neen ne’ebé akompaña ema sira ne’e.

Jornalista : Antónia Gusmão

Editora      : Julia Chatarina

HAKEREK NO HATÁN

Please enter your comment!
Please enter your name here