PPN Aniceto Longuinhos Guteres Lopez halo sorumutk ho Embaixadór Indonesia iha Timor-Leste, Sahat Sitorus iha PN, kuarta (22/09). Imajen TATOLI/Egas Cristóvão.

DILI, 22 setembru 2021 (TATOLI)–Prezidente Parlamentu Nasionál, Deputadu Aniceto Longuinhos Guterres Lopes ho Embaixadór Repúblika Indonézia iha Timor-Leste, Sahat Sitorus hala’o reuniaun ida hodi diskute futuru kooperasaun ne’ebé parlamentu rai rua ne’e presiza.

“Planu ba oin atu hasa’e kooperasaun entre parlamentu Timor-Leste ho Indonézia. Ha’u kontente no konkorda ho diskusaun entre Prezidente Kámara Indonézia ho Prezidente Parlamentu Timor-Leste nian iha Viena, Áustria. Ha’u fiar katak kooperasaun bilaterál rejionál, multilaterál entre nasaun rua, espesialmente programa sira, bainhira programa Governu nian apoia hosi parlamentu idak-idak nian,” Sahat Sitorus informa ba jornalista sira, iha uma fukun, kuarta ne’e.

Embaixadór ko’alia asuntu ne’e hafoin Prezidente Parlamentu Nasionál Timor-Leste reuniaun ida ho Reprezentante Kámara Indonézia, Puan Maharani iha Viena, Áustria iha loron 7 setembru liubá.

Embaixadór Sahat Sitorus orgullu ho reuniaun entre xefe lejizladór rai-rua nian iha Viena, Áustria tanba la’o ho susesu.

Embaixadór Repúblika Indonézia iha Timor-Leste ne’e informa ba Prezidente Parlamentu Nasionál katak, ninia mandatu sei hotu iha ínisiu fulan-outubru tinan ida-ne’e.

“Maske ha’u-nia mandatu hotu iha outubru, ha’u fiar katak ida foun ne’ebé sei mai kontinua nafatin kooperasaun ne’ebé iha. Ha’u hadomi tebes povu Timor-Leste,” nia dehan.

Notísia Relevante: Aniceto Guterres-Puan Maharani diskute futuru kooperasaun iha Áustria

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here