Prezidente Parlamentu Nasionál, Deputadu Aniceto Longuinhos Guterres Lopes hala’o reuniaun bilaterál ho Presidente Kámara Indonézia, Puan Maharani, iha sidade Viena, Áustria. Imajen/Mída PN.

DILI, 08 setembru 2021 (TATOLI)–Prezidente Parlamentu Nasionál, Deputadu Aniceto Longuinhos Guterres Lopes hala’o reuniaun bilaterál ho Prezidente Kámara Indonézia, Puan Maharani hodi diskutu futuru kooperasaun iha sidade Viena, Áustria.

Notísia Relevante: Prezidente Parlamentu 110 partisipa konferénsia dalimak iha Áustria

Prezidente Parlamentu Nasionál, Deputadu Aniceto Longuinhos Guterres Lopes, akompaña ho Vise-Prezidente Luis Roberto da Silva no Deputadu Antonio da Conceição, hala’o reuniaun bilaterál ho Prezidente Kámara Indonézia Indonézia (Ketua DPR Indonézia) Puan Maharani, ho nia ekipa, iha loron 7 fulan-setembru tinan 2021, iha Repúblika Áustria.

Reuniaun bilaterál ne’ebé hala’o iha momentu konferénsia mundial ba prezidente parlamentu sira ne’e ho objetivu atu reforsa liután relasaun bilaterál no diplomasia parlamentár entre Timor-Leste ho Indonézia.

“Ita promove no haburas valór demokrasia no respeita ba direitu umanu iha nível mundiál no rejionál, no esplora posibilidade no oportunidade ba parséria no kooperasaun ka asisténsia téknika direta ho Parlamentu Nasionál hodi konsolida no moderniza dezenvolvimentu institusionál ne’ebé refleta iha Planu Estratejiku Parlamentu Nasionál nian 2017-2022,” Aniceto Guterres ko’alia durante diskusaun entre parte rua, iha Viena, Áustria, ne’ebé Agência TATOLI asesu liuhosi komunikadu imprensa, kuarta ne’e.

Prezidente Kámara Indonézia nian promete katak Indonézia kontinua apoia Timor-Leste atu adere ba organizasaun ASEAN.

Parte rua mós konvida malu atu oinsá iha vizita kortezia vise-versa (ba-mai) hafoin pandemia COVID-19, atu hametin liután relasaun bilaterál.

“Dezde uluk, Indonezia kontinua apoiu Timor-Leste atu adere ba ASEAN. Kompromisu ne’e sei kontinua to’o agora,” Puan Maharani hateten.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here