Membru foun F-FDTL 239 hosi munisípiu Liquiça, Bobonaro, Ermera, Aileu, Manatuto no Baucau hahú aprezenta an ba Komandu Jenerál iha Fatuhada, Dili, kuarta (22/09/21). Imajen Tatoli/António Gonçalves.

DILI, 22 setembru 2021 (TATOLI)—Membru foun FALINTIL Forsa Defeza Timor-Leste (F-FDTL), hamutuk na’in 239 aprezenta-an ona ba faze dahuluk iha loron ohin, ba Komandu Jenerál iha Fatuhada, no hosi númeru ne’e iha na’in-tolu mak eliminadu.

Membru na’in 239 ne’e mai hosi munisípiu Dili hamutuk 48, Liquiça 27, Bobonaro 17, Ermera 53, Aileu 30, Manatuto 21 no Baucau 43.

Notísia relevante:Komandu husu membru foun F-FDTL 600 aprezenta an

Kadete na’in-tolu mak eliminadu, na’in-ida hosi Dili tanba iha problema pasadu, na’in-ida hosi Liquiça tanba envolve iha arte marsiál la deklara an no na’in-ida hosi Ermera mak la marka prezensa.

“Ohin imi mai aprezenta an hodi re-verifika fali naran atu inkorpora iha instituisaun,” Tékniku Komisaun Rekrutamentu, Komandu F-FDTL, Kapitaun Rui Soares fó instrusaun ba kadete foun-sira.

Desde iha faze teste rekrutamentu, Komandu husu onestidade kadete-sira nian katak, bainhira envolve iha arte marsiál tenke deklara an, maibé iha na’in-rua la deklara an, nune’e komisaun elimina.

“Orden Komandu katak, mai atu serbí la’ós tama forsa uza farda ba envolve fali iha organizasaun,” nia hateten.

Komandu mós husu ona ba kadete foun sira atu prepara mós roupa sivíl hanesan kamizola no sapatu desportu hodi utiliza bainhira dezloka ba Metinaro.

Tuir planu, ekipa médika Komandu, 23 setembru tuku 8:00 sei hala’o teste urine ba kadete feto-sira, bainhira identifika grávida sei elimina.

Iha 27 setembru tuku 9:00,  membru foun sira tenke marka prezensa iha kuartél hodi inkorpora iha instituisaun no aranka ba Metinaro atu hahú treinamentu durante fulan tolu.

Tuir oráriu iha 23 setembru kadete foun hosi munisípiu Lautém, Viqueque, Manufahi, Ainaro, Covalima no RAEOA, sei aprezenta an mós ba komandu.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here