Xefe Estadu Maiór F-FDTL, Brigadeiru Jenerál, Calisto dos Santos ‘Coliati’ ho ekipa, hala’o hela konferénsia imprensa, hodi ofisialmente fó-sai naran kadete foun, iha edifísiu Kuartél Jenerál F-FDTL, Fatuhada, kuarta (15/09/21). Imajen Tatoli/Nelson de Sousa.

DILI, 15 setembru 2021 (TATOLI)—Komandu FALINTIL Forsa Defeza Timor-Leste (F-FDTL), liu hosi komisaun rekrutamentu, ofisialmente públika ona naran membru foun hamutuk 600, ne’ebé liu ona selesaun iha faze finál, no husu atu aprezenta an iha meiu fulan ne’e.

Iha rezultadu selesaun ba membru foun, rezultadu finál iha 11% feto no maioria hosi veteranu nia oan, bazeia ba prioridade rekrutamentu tinan ida-ne’e nian.

Notísia relevante:Naran Kandidatu F-FDTL fó-sai ona ohin

“Ohin públika naran kadete ne’ebé pasa iha teste, hodi mai inkorpora iha instituisaun F-FDTL. Husu bele hakbesik an ba ida-idak nia munisípiu hodi haree naran. Kadete ne’ebé pasa tenke mai aprezenta an imediata tuir munisípiu hodi rona orientasaun,” Xefe Estadu Maiór F-FDTL, Brigadeiru Jenerál, Calisto dos Santos ‘Coliati’, hateten ba jornalista-sira liu hosi konferénsia imprensa, iha edifísiu Kuartél Jenerál Fatuhada, kuarta ne’e.

Komisaun rekrutamentu sei lori lista naran hodi taka iha fatin sira hanesan administrasaun munisípiu, komandu Polísia no sede konsellu kombatente libertasaun nasionál veteranu iha territóriu, inklui sei fó-sai via eletrónika iha média sosiál ka pajina F-FDTL nian.

Coliati husu kadete ne’ebé pasa, tenke mai aprezenta an imediata tuir munisípiu, hodi rona orientasaun hanesan, hosi Dili, Liquiça, Bobonaro, Ermera, Aileu, Manatuto no Baucau, iha kuarta 22 setembru 2021, tuku 9:00, fatin Kuartél Jenerál F-FDTL, Fatuhada, Dili.

Munisípiu Lautem, Viqueque, Manufahi, Ainaro, Covalima no RAEOA sei aprezenta an iha loron 23 setembru, oras no fatin hanesan, ho objetivu atu rona orientasaun hosi komisaun rekrutamentu.

Komandu husu ba kadete hotu tenke simu ona vasina primeira doze ba prevensaun COVID-19, antes mai aprezenta an no nafatin kumpre regra protokulu saúde.

Ba kandidatu ne’ebé la marka prezensa tuir loron no oras determinadu sei elimina ka reprova, no husu mós ba kadete sira ne’ebé hosi munisípiu dook, tenke mai hela ona iha Dili, hodi hein to’o loron inkorporasaun ba iha sentru instrusaun Metinaro ne’ebé sei hahú iha 27 setembru tinan ne’e.

Komandu enkoraza kandidatu ne’ebé antes ne’e tuir hotu teste maibé la pasa, komisaun husu lalika triste no lakon vontade, tanba nafatin sei iha oportunidade hodi kompete fali iha rekrutamentu 2022.

Kadete foun sira ne’ebé pasa ona, iha fulan rua ba kotuk tuir ona teste médika, psikotékniku, eskrita, orál no fizíka iha sentru instrusaun Metinaro.

Komandu mós prepara ona ekipamentu hanesan farda no seluk tan ba membru foun sira ne’ebé sei tuir treinamentu iha Metinaro durante fulan tolu.

Jornalista: Nelson de Sousa

Edtitór: Cipriano Colo

HAKEREK NO HATÁN

Please enter your comment!
Please enter your name here