Kondisaun atuál estrada ligasaun postu administrativu Lolotoe ba kapitál Maliana, kuarta (22/09/12). Imajen Tatoli/Sérgio da Cruz.

BOBONARO, 22 setembru 2021 (TATOLI)—Administradór postu adminístrativu Lolotoe, munisípiu Bobonaro, Alberto Seixas Perreira, preokupa ho estrada ligasaun postu adminstrativu Lolotoe ba Maliana, ne’ebé kondisaun grave.

“Tinan barak ona komunidade enfrenta difikuldade kona-bá estrada ne’ebá aat tanba iha tempu udan labele movimentu atu hatutan moris,” Alberto Seixas, hato’o asuntu ne’e iha serimónia pose ba membru Konsellu Polisiamentu Komunitária (KPK) na’in 105, iha Loloto’e Villa, kuarta ne’e.

Notísia relevante:Autoridade Bobonaro enkoraza populasaun Lolotoe simu vasina

Autoridade postu ne’e, fó hanoin ba Governu atu tau prioridade ba dezenbolvimentu infraestrutura bázika, tanba komunidade enfrenta problema sériu iha tempu barak nia laran.

Nune’e mós komunidade Martinho Belo, hato’o preokupasaun katak, baibain iha tempu udan komunidade sempre voluntariamente organiza-malu, kee rai, lalin fatuk taka estrada ko’ak ne’ebé nakonu ho bee, hodi fasilita movimentu.

“Tempu bailoron di’ak oitoan, maibé iha tempu udan mak susar tebes tanba tahu makás liu,” nia hateten.

Kona-bá ne’e, Xefe suku Guda, Caetano Fransisco, hato’o bebeik ona ba  nasionál no konsege hetan ona resposta pozitivu, maibé seidauk  másimu, tanba foin lalais hosi parte Institutu Jestaun Ekipamentu (IJE), lori mákina pezadu mai dudu rai iha área ne’e, maibé iha aldeia balun deit.

Iha fatin hanesan, Sekretáriu Autoridade munisípiu Bobonaro, Júlio de Carvalho Caero, rekoñese katak, kondisaun estrada difikulta duni movimentu populasuan atu buka moris, maibé problema ne’e kabe ba kompeténsia Governu sentrál.

Maski nune’e parte autoridade munisipál sei esforsu hodi relata nafatin kondisaun hotu-hotu ba Governu sentrál atu bele hatama iha planu Orsamentu Jerál Estadu (OJE).

Postu administrativu Lolotoe iha suku hitu mak hanesan, Gildapil, Opa, Lupal, Deudet, Lebos, Lontas no Guda ho populsaun 8.553 no totál uma-ka’in 1.801.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here