Komunidade ne’ebé atu sai ba munisípiu submete ba swab teste iha Sentru Integradu Jestaun Krize (SIJK), Tersa (21/09/21). Imajen Tatoli/António Gonçalves.

OÉ-CUSSE, 22 setembru 2021 (TATOLI)—Sentru Informasaun COVID-19 iha Rejiaun Administrativa Espesiál Oé-Cusse Ambeno (RAEOA), kuarta ne’e rejista kazu pozitivu foun-ida (1), ativu 56 no rekoperadu 241.

Notísia Relevante: COVID-19 iha RAEOA: pozitivu hitu, ativu 70 no rekoperadu 228

“Ohin, ita rejista kazu pozitivu foun ida (1), ativu ka baixa hela iha sala izolamentu hamutuk 56, no rekopera ona hamutuk 241,” Sekretário Rejionál Asuntu Saúde, Manuel da Costa, hateten liuhosi konferénsi imprensa iha Sikluli, Oé-Cusse.  

Kazu ativuu 56 ne’e, daudaun ne’e kumpre ka baixa hela iha sala izolamentu Kiumaonteko hamutuk 12, Alfandega Mahata 10, izolamentu Klinika Kurasaun hamutuk ualu (8), izolamentu Kitahara Mahata hamutuk 26.

Tuir dadus hosi 23 marsu 2020 to’o 22 setembru 2021, totál dadus komulativu kazu konfirmadu hamutuk 298, hasai teste swab 228, RDT swab 189, komulativu teste swab 3.542, komulativu rezultadu negativu 3.311.

Dadus pasajeiru ne’ebé kumpre kuarentena obrigatóriu 1.712, auto-kuarentena 305 ho totál hamutuk 2.017 no pasa ona loron 14 hamutuk 1.905 no rejista óbitu ida.

Daudaun ne’e pasajeiru sira-ne’ebé tama Oé-Cusse kumpre hela kuarentena hamutuk na’in-41, sira-ne’ebé hela iha auto-kuarentena Fulolo na’in-haat (4), kuarentena Sakato na’in-rua (2), uma Dra.Catarina Anunu ida (1), kuarentena Eskola ETARO Masin na’in-31, auto-kuarentena residensia Mateus Sufa na’in ida (1), auto-kuarentena Palaban na’in ida (1), auto-kuarentena Veronika Oématan na’in-ida (1).

Jornalista : Abílio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here