Pesoál médiku sira kontinua halo hela teste swab ba komunidade ne’ebé atu tama-sai ba Munisípiu seluk, tersa (21/9/2021). Imajen Tatoli/Antonio Gonçalves.

DILI, 21 setembru 2021 (TATOLI)—Sentru Informasaun COVID-19 iha Rejiaun Administrativa Espesiál Oé-Cusse Ambeno (RAEOA) tersa ne’e rejista kazu pozitivu hitu (7), ativu 70 no rekoperadu 228.

Notísia Relevante: COVID-19 iha RAEOA: pozitivu ida, ativu 85 no rekoperadu 212

“Ohin, ita rejista kazu pozitivu foun hitu (7), ativu ka baixa hela iha sala izolamentu hamutuk 70 no rekoperadu 228,” Sekretáriu Rejionál Asuntu Saúde, Manuel da Costa, hateten liuhosi konferénsia imprensa ne’ebé hala’o iha Sikluli, Oé-Cusse.

Kazu ativu na’in-70 ne’e, daudaun ne’e kumpre no baixa hela iha sala izolamentu Kiumaonteko na’in-15, Alfandega Mahata na’in-sia (9), izolamentu Klinika Kurasaun na’in-hitu (7), izolamentu Kitahara Mahata hamutuk na’in-37 no auto-izolamnetu na’in-rua (2).

Aleinde ne’e, nia informa, daudaun ne’e pasajeiru sira-ne’ebé tama Oé-Cusse kumpre hela kuarentena hamutuk na’in-50.

Sira-ne’ebé hela iha auto-kuarentena Fulolo na’in-haat (4), kuarentena Sakato na’in-rua (2), uma Dra.Catarina Anunu na’in-ida (1), kuarentena Eskola ETARO Masin na’in-40, auto-kuarentena rezidénsia Mateus Sufa nian ema na’in-ida (1), auto-kuarentena Palaban na’in-ida (1) no auto-kuarentena Veronika Oématan na’in ida (1).

Dadus pasajeiru ne’ebé kumpre kuarentena obrigatóriu 1.710, auto-kuarentena 305 ho totál hamutuk 2.015 no pasa ona loron 14 hamutuk 1.880 no rejista óbitu ida.

Tuir dadus hosi 23 marsu 2020 to’o 21 setembru 2021, totál dadus komulativu kazu konfirmadu hamutuk 299, hasai teste swab 190, RDT swab 189, komulativu teste-swab 3.504, komulativu rezultadu negativu 3.284.

Jornalista : Abílio Elo Nini

Editór      : Cancio Ximenes

HAKEREK NO HATÁN

Please enter your comment!
Please enter your name here