Ministru Defeza (MD), Filomeno da Paixão de Jesus. Imajen/MD.

BOBONARO, 15 setembru 2021 (TATOLI)—Ministru Defeza (MD), Filomeno da Paixão de Jesus, kontinua enkoraja populasaun iha munisípiu Bobonaro, atu ho voluntariamente hakbesik an ba sentru vasinasaun hodi simu vasina, nune’e aumenta imunidade kontra COVID-19.

“Moras ne’e tama mai ne’e, la’ós hosi aeroportu, la’ós hosi pontu entrada, tanba pesoál saúde sira kontrola. Moras ne’e tama hosi dalan kloot illegál sira ne’ebé la’o subar-subar ne’e. Entaun, inan-aman, joven no idozu iha fronteira tenke simu vasina hodi halakon tia moras aat ne’e,” MD husu iha kampaña vasinasaun iha suku Mali-Ubu, postu administrative Bobonaro, munisípiu Bobonaro, kuarta ne’e.

Notísia relevante:Autoridade sira apoia kampaña vasina iha baze

Ministru ne’e hateten, daudaun ne’e Governu esforsu hela buka mekanizmu hodi halo prevensaun di’ak liu, nune’e salva populasaun ho idade avansadu no komorbilidade.

Nia mós apela ba poplasaun atu labele konsumu informasaun hoax, tanba vasina ne’e Governu oferese, bazea ba teste hosi péritu iha laboratóriu internasionál sira iha nasaun avansadu-sira, nune’e la’ós atu estraga no oho populasaun.

Tuir dadus, iha 15 setembru totál populasaun munisípiu Bobonaro, hosi idade 18 ba leten ho komorbilidade hamutuk 56.744 mak simu ona vasina AstraZeneca.

Hosi númeru ne’e, iha 11.268 mak kompleta ona doze daruak no na’in 42.476 foin mak simu doze dahuluk ho totál 41,4%.

Evolusaun surtu COVID-19 iha Bobonaro ne’ebé MS rejista iha 14 setembru, kazu pozitivu lima, rekoperadu rua, ativu 136, kumulativu rekoperadu 387, kumulativu komfirmadu 532, óbitu ida no kumulativu óbitu sia.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here