Pesoál saúde sira hala’o teste swab ba komunidade atu sai ba munisipiu, iha Sentru Integradu Jestaun Krize (SIJK) Merkadu Lama, tersa (21/09/21). Imajen Tatoli/António Gonçalves.

DILI, 21 setembru 2021 (TATOLI)— Ministériu Saúde (MS) liu hosi Diresaun Jerál Serbisu Kooperativa, prepara ona dadus liña frente hamutuk 5000-resin, no sei halo hela verifikasaun, liuliu kompleta rekezitu molok submete ba Ministériu Finansa (MF), atu hala’o prosesu pagamentu.

Parte MS tenke halo fali verifikasaun tanba antes ne’e, iha Ministériu barak mak submete ona lista, maibé MF haruka fila fali tanba la prienxe rekezitu.

Notísia relevante:Pesoál liña frente prizionál hamutuk 206

“Agora-daudaun dadus iha ona 5000-resin.  Ami tenke verifika didi’ak no aban ami sei hala’o enkontru ho diretór munisípiu-sira  nune’e halo identifikasaun ba kategoria loloos,’’ Diretór Jerál Serbisu Kooperativa MS, Marcelo Amaral, hateten ba jornalista iha otél Novo Turizmu, tersa ne’e.

Parte MS sei asegura katak, pesoál liña frente-sira sei la lakon sira-nia direitu tanba ne’e maka  administrativamente tenke kompleta dokumentu, nune’e MF laiha tan problema kona-bá transferénsia osan ba ida-idak nia konta bankária.

MS halo kategorizasaun katak, profisionál saúde ne’ebé serbisu iha izolamentu, ekipa vasinasaun no kondutór, sei simu diretiru ho montante ne’ebé la hanesan.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here