Profisionál saúde sira halo kampaña nasionál fase liman hodi prevene COVID-19 iha resintu HNGV. Imajen TATOLI/António Gonçalves

DILI, 21 setembru 2021 (TATOLI)–Ministériu Finansa (MF) liuhosi Sekretariadu Fundu COVID-19 husu ba liña ministeriál sira atu submete lista profisionál liña frente  hodi prosesa suplementu remuneratóriu.

Koordenadór Jerál Sekretariadu Tékniku Fundu COVID-19, Ernesto da Conceição Silva, hateten, hafoin Prezidente Repúblika promulga Dekretu-Lei kona-ba suplementu remuneratóriu ba profisionál sira ne’ebé servisu iha ámbitu prevensaun no mitigasaun COVID-19 iha Timor-Leste, Sekretariadu foin simu pedidu pagamentu hosi instituisaun Ministériu Interiór (MI) no Ministériu Administrasaun Estatál (MAE), maibé hafoin halo verifikasaun Sekretariadu deside devolve hikas lista tanba la prienxe rekezitu.

“Nune’e, to’o agora ami seidauk simu lista pagamentu hosi liña ministeriál sira, maski halo kontaktu direta ona via telefónika no organiza reuniaun hodi fasilita ministériu sira informadu kona-ba pagamentu, maibé realidade ministériu sira seidauk submete lista,” Koordenadór Jerál Sekretariadu Fundu COVID-19  informa ba Agência TATOLI, via telefónika, tersa ne’e.

Notísia relevante: MF simu lista liña frente instituisaun rua ba suplementu remuneratóriu

Iha reuniaun sekretariadu iha loron 17 setembru, konvida mós Sala Situasaun, Sentru Integradu Jetaun Krize (CIGC, sigla portugés) no Ministériu Saúde (MS) hodi husu atu aselera pedidu pagamentu ba profisionál ne’ebé prienxe rekezitu.

“Sira resposta katak sei submete iha tempu badak, maibé realidade to’o agora ami seidauk simu, maibé ami kontinua komunika atu submete pedidu pagamentu,” nia akresenta.

Bainhira ministériu sira seidauk submete lista liña frente, maka impaktu ba ezekusaun Fundu COVID-19.

“Alokasaun orsamentu ba liña frente iha Fundu COVID-19 hamutuk millaun $51-resin, maibé to’o agora balansu sei nafatin no seidauk ezekuta, impaktu ida mak seidauk halo pagamentu suplementu remuneratóriu,” nia preokupa.

Daudaun ne’e, pedidu pagamentu hosi MI mak iha Sekretariadu Tékniku no halo hela verifikasaun, ne’ebé ninia lista iha rua hanesan funsionáriu elijível no Servisu Migrasaun.

Bazeia ba Dekretu-Lei ne’ebé Prezidente Repúblika promulga ona, Governu sei selu liña frente sira hahú fulan-marsu to’o 31 dezembru 2021, maibé atu selu hahú hosi fulan-marsu to’o agostu tinan ne’e.

Dekretu Lei kona-ba Suplementu Remuneratóriu define profisionál elejível ba direitu hetan direitu mak médiku, enfermeiru, auxiliár ba asaun médika, parteiru sira, tékniku análiza laboratóriu, tékniku saúde públika, tékniku radiolojia, sira-ne’ebé ezerse funsaun iha Sala Situasaun Jestaun Krize (CIGC, sigla portugés), motorista veíkulu, responsável sira-ne’ebé lori ema ba izolamentu obrigatóriu, elementu Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) ne’ebé envolve iha prevensaun no kontrolu COVID-19.

Nune’e mós, traballadór sira iha Autoriade de Inspesaun no Fiskalizasaun Atividade Ekonómika, Sanitária no Alimentár (AIFAESA), Diresaun Nasionál Kuarentena no Bioseguransa, Servisu Nasionál Intelijénsia, Diresaun Nasionál Seguransa Patrimóniu Públiku, no servisu autoridade ka administrasaun munisipál, responsável ba halibur, lori no soe lixu, sira ne’ebé hola parte servisu autoridade ka administrasaun munisipál, servisu munisipál ba fornesementu bee-moos, koveiru sira no sira-ne’ebé integra iha ekipa ne’ebé hala’o servisu iha Rejiaun Administrativa Espesiál Oé-cusse Ambeno (RAEOA).

Jornalista : Antónia Gusmão

Editora      : Julia Chatarina

HAKEREK NO HATÁN

Please enter your comment!
Please enter your name here