Profisionál saúde halo teste swab ba abitante iha Fatumeta, Dili, segunda (15/03). Imajen TATOLI/António Gonçalves

DILI, 31 agostu 2021 (TATOLI)–Ministériu Finansa (MF) liuhosi Sekretariadu Tékniku Fundu COVID-19, foin simu lista profisionál liña frente hosi Ministériu Interiór (MI) no Ministériu Administrasaun Estatál (MAE) atu simu suplementu remuneratóriu.

“Dekretu-Lei ne’e Prezidente Repúblika promulga ona, ne’ebé Sekretariadu Tékniku Fundu COVID-19 hein de’it liña ministériu sira atu submete pedidu mai. Daudaun iha ha’u-nia meza leten foin pedidu rua hosi ministériu rua,” Koordenadór Jerál Sekretariadu Tékniku Fundu COVID-19, Ernesto da Conceição Silva, relata ba Agência TATOLI, via telefónika, tersa ne’e.

Sekretariadu hatan ona karta hosi MAE, ne’ebé haruka hadi’a lista ne’ebé konsidera la prenxe rekezitu, nune’e bele submete filafali hodi bele verifika.

“Dekretu-Lei ne’e hateten katak liña frente ne’e ema sira ne’ebé serbisu direta ba prevensaun no mitigasaun COVID-19 no pesoál balun ne’ebé serbisu indereta, maibé iha relasaun ho prevensaun ne’e rasik, maibé hafoin ami identifika lista sira ne’e la prienxe, entaun ohin ami haruka filafali sira-nia dokumentu hodi hadi’a,” Koordenadór Jerál esplika.

Notísia relevante: PR promulga alterasaun daruak ba dekretu-lei suplementu remuneratóriu

Tuir Sekretariadu, pesoál balun ne’ebé prienxe rekezitu hosi parte MAE mak pesoál saneamentu no servisu jestaun merkadu, maibé iha lista ne’ebé submete mak pesoál sira hanesan motorista, pesoál sira ne’ebé lori karta ba-mai no balun asesór sira ne’ebé apoiu serbisu, tanba ne’e parte Sekretariadu konsidera la prienxe rekezitu.

Enkuantu, lista liña frente hosi MI, parte juríku sei haree didi’ak no bainhira verifika no konfirma prienxe ona rekezitu sira iha Dekretu-Lei maka parte Sekretariadu Téniku bele prosesa ona pagamentu.

“Lista hosi MI maioria hosi Servisu Imigrasaun. Kona-ba Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) tama kategoria, maibé sei haree ba sira ne’ebé serbisu direta ba prevensaun no mitigasaun COVID-19 mak bele iha direitu,” nia akresenta.

Bazeia ba Dekretu-Lei ne’ebé Prezidente Repúblika promulga ona, Governu sei selu liña frente sira hahú fulan-marsu to’o 31 dezembru 2021.

“Maibé atu selu hahú hosi fulan-marsu to’o agostu tinan ne’e,” nia hatutan.

Prezidente Repúblika, Francisco Guterres Lú Olo, promulga ona altersaun daruak ba Dekretu-Lei Suplementu Remunetrátoriu ba liña frente ne’ebé halo atividade profisionál iha situasaun pandemia COVID-19, ne’ebé pagamentu hahú iha marsu to’o dezembru 2021 bainhira orsamentu Jerál Estadu (OJE) 2021 ramata, karik presiza hatutan suplementu ne’e ba tinan 2022, presiza iha fali Dekretu-Lei foun ida.

Dekretu-Lei kona-ba Suplementu Remuneratóriu define profisionál elejível ba direitu hetan direitu mak médiku, efermeiru, auxiliár ba asaun médika, parteiru sira, téniku análiza laboratóriu, tékniku saúde públika, tékniku radiolojia, sira-ne’ebé ezerse funsaun iha Sala Situasaun, Sentru Integradu Jestaun Krize (CIGC, sigla portugés), motorista veíkulu, responsável sira-ne’ebé lori ema ba izolamentu obrigatóriu, elementu PNTL no F-FDTL ne’ebé envolve iha prevensaun no kontrolu COVID-19.

Nune’e mós, traballadór sira iha Autoridade de Inspesaun no Fiskalizasaun Atividade Ekonómika, Sanitária no Alimentar (AIFAESA),Diresaun Nasionál Kuarentena no Bioseguransa, Servisu Migrasaun no Autoridade Aduaneira, Servisu Nasionál Intelijénsia,  Diresaun Nasionál Seguransa Patrimóniu Públiko, no servisu autoridade ka administrasaun munisipál,  responsável ba halibur, lori no  soe lixu, sira-ne’ebé hola parte servisu autoridade ka administrasaun munisipál,  servisu munisipál ba fornesimentu bee-moos, koveiru sira no sira-ne’ebé integra iha ekipa ne’ebé hala’o servisu iha Rejiaun Adminstrativa Espesial Oé-cusse Ambeno (RAEOA).

Antes ne’e, Prezidente Repúblika promulga Dekretu-Lei númeru 17/2020 loron 30 abríl, hodi fó direitu ba traballadór liña frente, atu idaidak simu mós suplementu remuneratóriu ida, ho efeitu hosi marsu 2020, maibé iha fulan-setembru 2020, Dekretu-Lei ne’e hetan alterasaun dahuluk.

Nune’e, ho alterasaun daruak ba Dekretu-Lei ne’e, aumenta tan profisionál sira ne’ebé iha direitu ba hetan suplementu  remuneratóriu ne’e hanesan tékniku sira-ne’ebé partisipa iha programa vasinasaun kontra COVID-19, guarda prizionál, sira-ne’ebé servisu protesaun sívil, inklui bombeiru no traballadór sira seluk ne’ebé hala’o serbisu iha sentru izolamentu, profilátiku ka terapéutiku,  no sira-ne’ebé kuida pasiente COVID-19 sira hanesan tau matan ba  seguransa no servisu limpeza no mós sira-ne’ebé halo jestaun lixu.

Ho alterasaun ne’e, traballadór sira-ne’ebé serbisu iha administrasaun direta ka indireta Estadu no hala’o knaar iha risku laran relasiona ho COVID-19 hosi marsu 2020, bainhira hatudu prova dokumentál, iha direitu atu hetan pagamentu suplementu remuneratóriu ba kada loron serbisu efetivu ne’ebé halo ona.

Ida-ne’e ho objetivu atu proteje direitu adquiridu hosi traballadór sira iha liña frente hosi kedas marsu 2020 mak Prezidente Repúblika veta diploma kona-ba Suplementu Remuneratóriu ne’ebé Governu hato’o iha fulan-jullu 2021.

Jornalista : Antónia Gusmão

Editora      : Julia Chatarina

1 KOMENTÁRIU

  1. Oin sa hanesan Professor sira implementa regras prevensaun Covid-19 iha Eskola no Inspesaun Edukasaun halo kontrolu no fahe informasaun implementasaun ba Prevensaun Covid-19, iha direitu ba suplemento remuneratoriu ne ka lae?

HAKEREK NO HATÁN

Please enter your comment!
Please enter your name here