Diretór PDHJ, Unidade Territoriál Bobonaro, Domingos Pinto Tavarez. Imajen Tatoli/Sérgio da Cruz.

BOBONARO, 21 setembru 2021 (TATOLI)—Hahú hosi fulan janeiru to’o setembru tinan ne’e, Provedoria Direitu Umanu  no Justisa (PDHJ), Unidade Territoriál Bobonaro, simu keixa violasaun direitu umanu hamutuk 21.

Keixa-sira ne’e moria hasoru ajente Estadu hanesan kazu abandonadu, ne’ebé membru polísia mak halo hakarak hola tia feto, ikus-mai lakohi kaben, iha mós hosi kargu diresaun xefia-sira no komunidade balun keixa kona-bá oan mate tanba monu iha mota.

Notísia relevante:Cesta Bázika, PDHJ rejista kompañia tolu iha indísiu irregularidade

“Kazu hirak-ne’e, PDHJ fó ona notifikasaun primeiru ba kesar na’in-sira hodi deklara katak, keixa ne’e PDHJ rezista ona, hodi hein fali notifikasaun segundu atu hateten katak, keixa sira ne’e PDHJ  loke ona prosesu investigasaun, mediasaun, konsiliasaun no taka ho refere ba instituisaun kompetente” Diretór PDHJ, Unidade Territoriál Bobonaro, Domingos Pinto Tavarez, hateten ba jornalista iha knaar fatin, tersa ne’e.

PDHJ la simu keixa ruma kona-bá ema ne’ebé mate kauza hosi vasina, maibé rejista de’it keixa kona-bá dezentendimentu, entre pesoál liña frente hasoru komunidade, tanba la satisfáz ho atendimentu no balun la koopera ho pesoál saúde atu simu vasina.

Kona-bá kazu inan-faluk, Hilária de Jesus nia-mate, PDHJ rekolla informasaun no hato’o ona relatóriu ba diresaun fiskalizasaun, liuhosi análiza legál mak aprezenta ba Primeiru Ministru (PM), hodi hato’o rekomendasaun ba ériu Saúde, Oraganizasaun Mundiál Saúde (OMS), hodi hadi’a atendimentu ne’ebé konsidera ladún di’ak.

Iha aplikasaun teste swab no implementasaun vasina, PDHJ nota katak, iha instituisaun Estadu balun viola direitu umanu, tanba obriga funsionáriu atu simu vasina, maibe iha situasaun pandemia globál afeta ba Timor-Leste, funsionáriu hanesan ajente Estadu iha devér no obrigasaun atu kolabora hodi kontribui ba programa Governu.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here