Batar "fuhuk", koto "fuhuk" no modo dodok ne'ebé CAC foti bainhira halo monitorizasaun iha prosesu distribuisaun sasán Cesta Bázika iha Super Merkadu Dili Mart, Raikotu, Comoro, Dili, kuarta (09/12). Imajen/CAC

DILI, 08 jullu 2021 (TATOLI)—Tuir rezultadu monitorizasaun hosi Provedoria Direitu Umanu no Justisa (PDHJ, sígla portugés), identifika kompañia fornesedór Cesta Bázika tolu mak iha indísiu  irregularidade, durante distribuisaun.

Monitorizasaun ne’e, bazeia ba mandatu PDHJ ne’ebé prevee iha artigu 27 Konstituisaun no lei númeru 8/2009 estututu PDHJ, artigu 24 fó dalan hodi halo monitorizasaun ba serbisu públiku inklui distribuisaun Cesta Bázika.

Notísia relevante:MF halo pagamentu Cesta Bázika faze daruak millaun $13,6

PDHJ hahú akompaña desde lansamentu programa Cesta Bázika iha 2020 to’o  oras ne’e hodi tun ba terrenu no halo monitorizasaun to’o  simu keixa komunidade bainhira mosu preokupasaun.

Diretór Monitorizasun no Rekomendasaun PDHJ, Bortolomeu Gonçalves, hateten mekanizmu monitorizasaun ne’ebé PDHJ uza, durante ne’e haree ba prevensaun ho nia rekomendasaun.

“Bainhira mosu indíiíu violasaun prinsípiu boa-governasaun, sei apura ho loos no indísiu korrupsaun ne’ebé la tama iha kompeténsia, PDHJ rekolla informasaun mak sei hato’o ba entidade revelante atu  aprofunda investigasaun,” Bortolomeu Gonçalves, hateten ba jornalista Agência Tatoli, iha kna’ar fatin, Caicoli, kinta ne’e.

Durante monitorizasaun, PDHJ identifika indísiu irregularidade ne’ebé komete hosi kompañia balun ho tipu hanesan presu produtu naan karau, mina-hán no kafé ne’ebé la korresponde ba valór iha merkadu sa’e makás, kuantidade ka  kilograma presu la tuir padraun ne’ebé termina tuir kontratu.

“To’o agora iha kompañia tolu mak ita rekolla informasaun hotu ona, no hato’o ona ba Komisaun Anti Korrupsaun (CAC sígla portugés), atu bele loke prosesu tuir-mai,’’ nia hateten.

PDHJ mós sei verifika irregularidade balun ho tipu hanesan, bainhira finaliza rekolla informasaun sei haruka ba CAC liga ho kuantidade foos.

Iha fatin balun  mós PDHJ identifika katak, foos ne’ebé Sentru Lojístika Nasionál  (CLN sígla portugés) iha, kompañia-sira sosa ho 25kg, maibé tetu fila-fali la to’o iha de’it 15 ka 19kg.

“Foos hakerek 25kg, maibé tetu kuaze 15 kg de’it. Ida-ne’e ho intensaun ne’ebé bele prezudika Estadu no sidadaun, tanba foos saku ida 25kg fahe ba sidadaun na’in-rua, kada ema hetan 12kg  maibé realidade tetu la to’o,’’ nia subliña.

Alende ne’e, iha kazu balun ne’ebé identifikadu iha indísiu ba violasaun prinsípiu boa-governasaun, liga ba prosesu tenderizasaun ne’ebé la transparente, ezemplu kompañia ida rejista nia lisensa atu halo de’it operasaun iha atividade konstrusaun sivíl, maibé hetan mós oportunidade ba distribuisaun Cesta Bázika.

“Kazu ne’e tama iha kompeténsia PDHJ ne’ebé daudaun-ne’e sei hakle’an, hafoin fó-sai relatóriu ikus,’’ nia konta-tuir.

Buat seluk ne’ebé PDHJ haree durante monitorizasaun ba parte prevensaun nian maka, identifika iha terrenu iha protudu balun laiha kualidade hanesan fuhuk, prazu liu ona, produtu importasaun kuaze domina kompara ho produtu lokál.

Alende ne’e, labarik ho idozu balun hetan diskriminasaun tanba la hetan variedade produtu, hanesan na’an no susu-been.

“Situasaun sira ne’e akontese dala sanulu resin, bainhira iha monitorizasaun identifika iha Dili no munisípiu no ita halo kedan intervensaun, kontaktu direta ho ministériu no kompañia hodi suspende provizóriu ikusmai konsege kompleta produtu, tuir padraun ne’ebé aplika,’’ nia subliña.

Ekipa mós identifika komunidade barak naran laiha iha fixa família, nune’e labele hetan direitu, tanba fallansu hosi baze dadus mai hosi líder komunitáriu hato’o ba Ministériu Administrasaun Estatál (MAE) hodi kruza informasaun.

PDHJ mós haruka ona karta ba Primeiru Ministru (PM), atu halo intervensaun ba ministériu ne’ebé responsável, hodi hadi’a kualidade produtu, baze dadus, garante sistema aprovizionamentu transparente ne’ebé ikus-mai hatudu pozitivu.

PDHJ destaka funsionáriu na’in-sanulu iha Dili no na’in-tolu destaka ba kada munisípiu no iha reprezentasaun territoriál hanesan Baucau, RAEOA, Same no Suai hodi halo monitorizasaun.

Durante monitorizasaun, ekipa PDHJ hasoru difikuldade hanesan ho orsamentu no ekipamentu prevensaun COVID-19.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here