Pesoál saúde prepara ekipamentu vasina hodi fó vasina Astrazeneca ba komunidade iha Sentru Saúde Comoro, segunda (13/09). Imajen TATOLI/António Gonçalves

BAUCAU, 20 setembru 2021 (TATOLI)—Servisu Saúde munisípiu Baucau iha estratejia foun hodi halo kampaña vasinasaun kontra COVID-19, ne’ebé atu tun direta ba uma komunidade hodi konvense liu hodi partisipa másimu.

“Iha Baucau villa, ami hahú ona no ba oin ami sei trasa planu atu buka tuir iha uma, tanba haree ba komunidade nia konsiénsia, balun hakarak vasina maibé balun lakohi, enkuantu balun iha influénsia hosi informasaun ne’ebé espalla iha rede sosiál,” Diretór Servisu Saúde munisípiu Baucau, Domingos Reinaldo da Costa Guterres, hateten iha edifísiu Radio Komunidade Lian Matebian, Villa nova, segunda ne’e.

Notísia relevantePopulasaun Baucau 33% simu ona vasina dahuluk

Servisu Saúde muda estratejia tanba hakarak prevene komunidade hosi moras COVID-19 tanba komunidade barak mak seidauk iha konsiénsia hola parte iha kampaña vasinasaun, enkuantu munisípiu Baucau daudaun ne’e klasifikadu transmisaun komunitária.

Nune’e, Diretór servisu munisipál ne’e husu komunidade nia konsiénsia atu kontribui másimu iha kampaña vasinasaun, hanesan meiu efetivu prevene-an hosi COVID-19.

Biban ne’e, nia apela ba joven sira atu ajuda inan-aman ne’ebé tama kategoria idozu no inválidez ne’ebé seidauk vasina, atu hakbesik-an iha fasilidade saúde no simu vasina.

“Husu ba jove sira labele fiar liu hoax hodi influénsia inan-aman sira atu la partisipa vasina,” nia hatutan.

Servisu Saúde Baucau mós nafatin hala’o koordenasaun ho liña ministeriál seluk, hanesan Ministériu Admistrasaun Estatál (MAE) no líder komunitáriu hotu atu organiza, halibur no mobiliza komunidade partisipa másimu iha programa nasionál ne’e.

“Liuliu xefe suku, aldeia, delegadu/a sira, oinsá bele mobiliza komunidade ba fatin ne’ebé ita prepara ona atu fó vasinasaun,” Domingos hatutan.

Tuir dadus hosi Ministériu Saúde, ema elijível ho idade 18 ba leten iha munisípiu Baucau ne’ebé simu ona imunizasaun kontra COVID-19 ba doze dahuluk hamutuk 38.747, enkuantu doze daruak hamutuk 18.433.

Jornalista : Natalino Belo

Editora      : Julia Chatarina

HAKEREK NO HATÁN

Please enter your comment!
Please enter your name here