Diretora Jerál Prestasaun Saude, Odete da Silva Viegas, sensibiliza importansia vasinasaun iha salaun apuramentu administrasaun munisípiu Baucau, kinta (12/08). Imajen TATOLI/Natalino Belo

BAUCAU, 12 agostu 2021 (TATOLI)–Diretora Jerál Prestasaun Saude, Odete da Silva Viegas, informa, populasaun Baucau 33% mak simu ona vasina dahuluk, tanba ne’e nia husu atu hakbesik-an iha postu vasina kompleta.

“Munisípiu Baucau iha 33% simu ona doze dahuluk no agora ita haree ba doze daruak foin mak atinje 3% de’it, entaun ita hakarak husu ema sira ne’ebé simu ona doze dahuluk atu kompleta doze daruak, atu nune’e vasina nia efetividade ba isin bele sa’e ba 83-84%, signifika risku atu hetan moras kiik,” Diretora Jerál Prestasaun Saúde, hateten, bainhira partisipa lansamentu kampaña vasinasaun, iha salaun apuramentu admistrasaun munisípiu Baucau, kinta ne’e.

Tuir dadus hosi servisu saúde munisípiu Baucau, daudaun ne’e vasina ona 27.239 (37%), númeru seidauk vasina 46.078 (63%), hosi totál abitante 73.313.

Enkuantu, kampaña vasinasaun ne’ebé lansa ohin tuir alvu doze 49.972 ne’ebé sei termina iha loron 24 agostu.

Odete konsidera ekipa interministeriál ne’ebé forma bele hakma’an ona serbisu Ministériu Saúde (MS) tanba atu kombate pandemia COVID-19 presiza entidade hotu atu hamutuk kontribui.

“Ita espera vasina to’o fulan-setembru nia laran, doze dahuluk bele konklui ona ba ema ho tinan 18 ba leten no espera katak ho partisipasaun másimu,” nia akresenta.

Horiseik vasina doze 300.000 mak to’o ona hosi Austrália no ohin doze 168.000 hosi Governu Japaun.

Tuir planu MS, tempu badak sei fó vasina ba labarik tinan 12 to’o 17, tanba ne’e hahú orienta rekolla númeru labarik sira tama kategoria, tantu iha eskola no la eskola.

“Ita espera fulan-setembru nia laran vasina Pfizer sei to’o iha ne’e hodi hahú vasina ba oan sira ne’ebé mak sai ameasa ba moras variante delta, tanba barak liu afeita ba labarik sira,” nia subliña.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here