Estudante Eskola Sekundária Tékniku Vokasionál Teknolojia no Industriál Becora. Imajen TATOLI/Egas Cristóvão

DILI, 09 setembru 2021 (TATOLI)—Ministru Prezidénsia Konsellu Ministru, Fidelis Manuel Leite Magalhães, hateten, maski iha ezekusaun medida Estadu Emerjénsia (EE) ba da-XVII la temi direta reativa aula prezensiál, maibé Ministériu Edukasaun, Juventude no Desportu (MEJD) iha kompeténsia halo despaixu atu reativa aula prezensiál.

“Aula prezensiál hein despaixu hosi MEJD tanba natureza tékniku, liuliu kona-ba labarik sira tanba tenke fó flesibilidade bainhira iha situasaun ruma derrepente iha instalasaun eskola sira, Ministériu Saúde bele fó kedan rekomendasaun ba Ministru Edukasaun no Ensinu Superior halo kedan diploma ministeriál de’it, la presiza Konsellu Ministru reúne hodi deside,” Ministru Prezidénsia KM, Fidelis Manuel Leite Magalhães, relata hafoin reuniaun ezekutivu iha Palásiu Governu, kinta ne’e.

Notísia relevante: MESSK hein rekomendasaun MS atu reativa aula prejensiál

Portavóz Governu ne’e esplika, kada asuntu ne’ebé antes ne’e ezekutivu sira deside, bainhira atu altera  tenke liu fali hosi Konsellu Ministru.

“Bainhira Konsellu Ministru fó kompeténsia ba Ministru sira atu halo despaixu, entaun ne’e fó liu flesibilidade atu Ministru sira hasai desizaun adapta ba situasaun nia evolusaun, satán variante delta ne’e variante ne’ebé maka da’et mós ba labarik sira, enkuantu labarik sira maioria seidauk hetan vasina,” Ministru subliña.

Governante ne’e husu ba estudante sira, bainhira Governu reativa aula prezensiál tenke kumpre regra prevensaun sira tanba estudante tenke sai ezemplu ba sosiedade.

Antes ne’e, liuhosi despaixu, Ministru Edukasaun, Juventude no Desportu, Armindo Maia, anunsia katak durante períodu konfinamentu domisiliáriu no serka sanitária sei suspende aula prezensiál iha Dili, Manufahi, Covalima, Ermera, Baucau no Rejiaun Administrativa Espsiál Oé-cusse Ambeno (RAEOA).

Iha mós posibilidade, suspende aula prezensiál iha munisípiu seluk ne’ebé rejista iha aumentu signifikadu kazu konfirmadu COVID-19.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here