Ministru Asuntu Parlamentár no Komunikasaun Sosiál, Francisco Martins da Costa Perreira Jerónimo, halo sosializasaun kampaña vasina kontra COVID-19 iha aldeia Quirilelo suku Liurai, tersa (14/09). Imajen TATOLI/Francisco Sony

DILI, 20 setembru 2021 (TATOLI)–Ministru Asuntu Parlamentár no Komunikasaun Sosiál (MAPKOMS), Francisco Martins da Costa Perreira Jerónimo, iha segunda ne’e, relata progresu servisu MAPKOMS nian ba Primeiru-Ministru (PM), Taur Matan Ruak, ligadu ho kampaña nasionál vasinasaun kontra COVID-19.

Antes ne’e, atu hasa’e númeru partisipasaun kampaña vasina, Xefe Governu orienta nia membru sira hodi tun baze hodi fahe informasaun kona-ba importánsia vasinasaun iha ámbitu pandemia.

“Ha’u hato’o ba Primeiru-Ministru kona-ba atividade MAPKOMS durante semana tolu, ne’ebé servisu iha munisípiu ligadu ho kampaña vasina ne’ebé ha’u mós hetan knaar ida hodi ba halo iha munisípiu Manatuto no Aileu,” Ministru Francisco Jerónimo, relata hafoin ramata reuniaun ho PM iha Rezidénsia Ofisiál, Farol.

Notísia relevante: MAPKOMS enkoraja populasaun Aileu partisipa vasina

Hafoin relata atividade sira, MAPKOMS simu fali orientasaun hodi kontinua atividade sira iha baze, liliu masimiza imunizasaun kombate COVID-19 no atividade liga ho komunikasaun sosiál.

“Orientasaun maka oinsá atividade kampaña vasinasaun ne’e mobiliza maka’as liután, tanba vasina ne’e sai ona kampaña nasionál nune’e sidadaun hotu iha poder kontribui ba saúde públika,” nia akresenta.

To’o loron 19 setembru 2021, totál ema elejível ho idade 18 ba leten ne’ebé simu ona imunizasaun COVID-19 doze dahuluk iha territóriu tomak hamutuk 417.931 ho persentajen 55,4%, enkuantu ba doze daruak hamutuk ema 245.038 ho persentajen 32,5%.

Aleinde ne’e, MAPKOMS hala’o hela servisu instalasaun sistema dijitalizasaun Rádiu Televizaun Timor-Leste, Empreza Públika (RTTL, E.P) nian iha munisípiu Liquiçá, Dili, Aileu, Ermera no Bobonaro.

MAPKOMS mós hakbesik hela ba komunidade hodi badinas lee, nune’e harii sentru juventude suku hodi bale kapasita joven sira iha área jornalizmu no área sira seluk.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here