Ministru Asuntu Parlamentár no Komunikasaun Sosiál, Francisco Martins da Costa Jerónimo. Imajen TATOLI/Francisco Sony

AILEU, 17 setembru 2021 (TATOLI) – Ministru Asuntu Parlamentár no Komunikasaun Sosiál (MAPKOMS), Francisco Jerónimo, sesta ne’e, kontinua  halo kampaña vasina kontra COVID-19 iha Postu Administrativu Lequidoe, Munisipiu Aileu no enkoraja komunidade sira partisipa másima iha vasina.

“Ha’u mai iha fatin ida ne’e atu ko’alia ba komunidade hotu katak, vasina ne’ebé agora Governu sosa atu ema hotu simu hodi kontra COVID-19,” Ministru Francisco Jerónimo hateten  komunidade sira iha Lequidoe.

Nia dehan, Governu la halo polítika hodi oho fali nia povu. Ne’e laiha, tanba ne’e  lalika ta’uk no tenke ba vasina atu nune’e bele sirkula livre iha timor laran.

Nia fó sasin katak, lider boot Timor-Leste nian barak partisipa ona iha vasina AstraZaneca no Sinovax. Tanba ne’e povu hotu labele duvida no labele ta’uk partisipa másimu iha vasina.

Nia dehan, iha Timor – Leste vasina iha primeira doze besik ona  50%. Enkuantu iha Munisipiu Aileu to’o ohin foin atinje 33% mak simu ona vasina AstraZaneca.

Iha fatin hanesan Administradór Munisipiu Aileu, Abel da Conceição husu ba populasaun Aileu hotu atu partisipa másimu iha vasina ne’e.

“Dala ida tan, ha’u husu ba inan aman hotu lalika rona lia falsu sira iha media sosiál dehan, vasina ne’e la di’ak. Vasina ne’e di’ak, ha’u rasik simu ona doze daruak (kompletu) no  ha’u di’ak hela,” Abel da Conceição hateten.

Xefe Aldeia Leubutu, Suku Bereleu, Postu Administrativu Lequidoe, Domingos Rodrigues,  fó sasin, laiha impaktu ba vasina tanba nia rasik simu ona vasina dala rua.

“Buat ne’e simu baibain hela, uluk ha’u iha moras oioin, maibé simu tiha vasina buat sira ne’e lakon hotu,” nia hateten.

Jornalista   : Hortencio Sanchez

Editór         : Francisco Simões

HAKEREK NO HATÁN

Please enter your comment!
Please enter your name here