Presidente Institutu Nasionál Seguransa Sosiál (INSS) Longuinhos Armando. Imajen/Egas Cristovão.

DILI, 20 setembru 2021 (TATOLI)—Prezidente Institutu Nasionál Seguransa Sosiál (INSS), Longuinhos Armando Leite, informa INSS halo ona pagamentu ba entidade empreza no fakultativu sira hamutuk 11.489.

Notísia Relevante: INSS halo ona pagamentu ba entidade empregadór-fakultativu 8.632

“Osan $22.650.000 ne’ebé Governu transfere ba INSS nia konta no ita ezekuta ona kuaze $4.958.692,93 (besik millaun lima), to’o agora ita ezekuta kiik liu tanba foin mak 23% no saldo hela $17.691.308,65. Hosi osan besik millaun $5 ne’e ita selu ona ema hamutuk 11.889,” Longuinhos Armando Leite hateten ba Agência TATOLI, iha nia knaar fatin, Caicoli, Dili, segunda ne’e.

Hosi ema 11.889 ne’e, nia informa, kompostu hosi traballadór ne’ebé ativa hela iha empreza 7.894 ho osan $1.271.118; despensa kontributivu ba entidade empregadór hamutuk 294 ho osan $274.073; ba fakultativu INSS selu ona ema hamutuk 1.373 ho nia osan $251.509; despensa kontributivu ba fakultativu 1.373 ho osan $29.295.

Osan ne’ebé transfere direita ba entidade empregadór hamutuk ema 493 ho osan $2.575.247; apoiu eletresidade ba entidade empregadór 273 ho osan $377.849 no apoiu renda ba entidade empregadór hamutuk 181 ho osan $175.598.

INSS nia estimasaun ba finalizasaun pagamentu empregu sira sei konklui iha fulan-novembru nia-laran, tanba INSS mós sei halo verifikasaun ba dokumentu benefisiáriu sira-nian.

“Ita-nia saldo $17.691.308,65 ne’e, ha’u orienta ona ha’u-nia tékniku sira atu aselera no hanoin iha novembru nia-laran bele konklui ona pagamentu ba empregu sira,” nia dehan.

Prezidente INSS ne’e hateten, verifikasaun mós sei kleur tanba iha dokumentu ida-nia laran, iha empreza tolu ka haat entaun presiza tempu mak bele finaliza.

Kestaun seluk mak ezekusaun tarde uitoan tanba barak mak husu para atu transfere osan direta ba sira-nia konta bankaria, entaun ho ida-ne’e tarde liu maibé bainhira ba iha empreza mak empreza selu fali nia traballadór ne’e lalais

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here