Prezidente INSS, Longuinhos Armando Leite. Imajen TATOLI/Egas Cristóvão

DILI, 24 agostu 2021 (TATOLI)—Prezidente Institutu Nasionál Seguransa Sosiál (INSS), Longuinhos Armando Leite, informa to’o semana ne’e INSS halo ona pagamentu ba entidade empregadór no fakultativu hamutuk 8.633 ho montante $4.083.740.

Notísia Relevante: Governu halo ona pagamentu ba entidade empregadór-fakultativu 7.302

“To’o agora, ita selu ona ita-nia entidade empregadór no fakultativu tantu foun no tuan hamutuk 8.633 ho orsamentu $4.083.740. Pagamentu ida-ne’e selu ba dala lima ona,” Prezidente INSS hateten ba Ajénsia TATOLI, iha nia kaar fatin, Caicoli, Dili, tersa ne’e.

Tuir dadus ne’ebé tama ona mak hosi fakultativu hamutuk 1.364 ho osan $251.509, ba traballadór sira-ne’ebé selu ona hamutuk 566.000 ho nia osan hamutuk $3.146.166 no ajuda mós ba empreza sira hanesan eletresidade no renda.

“Ba eletresidade ita selu ba ita-nia entidade empregadór hamutuk 203 ho nia osan $275.230. Governu mós fó apoiu renda ka aluga fatin nian. Ida-ne’e ita selu ona ba entidade empregadór hamutuk 137 ho montante orsamentu $136.633,” nia dehan.

Kona-ba despensa kontributivu, INSS selu ona traballadór sira hamutuk 1.606 ne’ebé rejistu nanis iha INSS maibé ida-ne’e empreza mak husu halo dispensa ba pursentu neen (6%) nian.

Nia hateten, prosesu pagamentu sei kontinua nafatin tanba sei iha empregu balun ne’ebé mak sei iha prosesu verifikasaun nia-laran.

Bainhira pagamentu apoiu empregu finaliza mak iha traballadór no entidade empregadór balun mak seidauk simu, nia dehan, mai direta iha INSS atu reklama katak nia hatama dokumentu maibé seidauk simu nia direitu, maibé tenke mai ho kartaun ka billete ne’ebé INSS entrega ba sira bainhira mai rejista.

Jornalista : Osória Marques

Editór        : Cancio Ximenes

HAKEREK NO HATÁN

Please enter your comment!
Please enter your name here