Ministru Prezidénsia Konsellu Ministru, Fidelis Maunel Leite Magalhães. Imajen TATOLI/Francisco Sony

DILI, 18 agostu 2021 (TATOLI)—Ministru Finansa (MF), Rui Augusto Gomes, aprezenta opsaun polítika-lejizlativa subjasente iha reuniaun Konsellu Ministru (KM), kona-ba proposta kriasaun subsídiu alimentar no transporte ba funsionáriu publiku sira.

“Opsaun kona-ba subsídiu transporte prevee atu substitui atribuisaun karreta Estadu, ne’ebé ho subsídiu ne’e permite hamenus kustu jestaun no manutensaun karreta,” Ministru Prezidénsia Konsellu Ministru, Fidelis Manuel Leite Magalhães, hateten hafoin ramata reuniaun ezekutiva iha Palásiu Governu, kuarta ne’e.

Ho proposta ne’e, sei fó subsídiu ba funsionáriu públiku, liuliu kargu xefia sira hodi la presiza lori karreta ba uma.

“Objetivu hosi polítiku ne’e, iha futuru mai sei la atribui karreta ba funsionáriu públiku hodi lori ba uma, ne’ebé karreta sira sei sai operasionál de’it no sei halo jestaun ne’ebé di’ak liu, nune’e Governu aloka duni ba ministériu ne’ebé presiza duni no serbisu loron-loron ho sidadaun mak bele iha transporte, enkuantu sira ne’ebé foku ba administrasaun la presiza karreta hela ho sira,” Ministru esplika.

Karreta Estadu sira sei uza durante oras serbisu de’it no fila ba uma ho transporte rasik.

“Nune’e bele redús gastu ne’ebé daudaun iha ba kombustível no manutensaun, tanba tinan 20-nia laran gasta ba manutensaun no kombustível liu ona millaun $200,” Portavóz Governu dehan.

Enkuantu, opsaun kona-ba subsídiu alimentár prevee atribuisaun mensál ba bens alimentár hosi produsaun lokál ba funsionáriu públiku sira.

Nune’e, kriasaun ba subsídiu rua ne’e sei halo análiza no sei delibera filafali iha sorumutuk ezekutivu tuir mai.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here