Primeiru Ministru, Taur Matan Ruak, prezide reuniaun extradordinária Konsellu Ministru, iha Palásiu Governu, segunda (20/09). Imajen TATOLI/Francisco Sony

DILI, 20 setembru 2021 (TATOLI)—Ministru Finansa, Rui Augusto Gomes, aprezenta Projetu Dekretu-Lei iha reuniaun Konsellu Ministru (KM) extraordinária, kona-ba kriasaun subsídiu mensál ai-han ba funsionáriu públiku.

“Subsídiu ne’e hanesan produtu agríkola nasionál, ne’ebé sei fó ba funsionáriu públiku sira ho objetivu permite hamenus despeza ho akizisaun ba ai-han inklui konfesaun refeisaun sira,” Ministru Prezidénsia Konsellu Ministru, Fidelis Manuel Leite Magalhães, relata, hafoin reuniaun ezekutivu, iha Palásiu Governu, segunda ne’e.

Notísia relevante: Governu planeia kria subsídiu alimentár no transporte ba funsionáriu públiku

Aleinde ne’e, inisiativa ne’e atu promove akizisaun produtu agríkola hosi produtór nasionál no atu insentiva aumentu produtividade setór agríkola.

Sentru Lojístika Nasionál (CLN, sigla portugés) mak sei haree ba akizisaun, jestaun, no armazenamentu produtu sira hafoin halo distribuisaun ba órgaun sira.

Kada fulan funsionáriu públiku sira iha direitu ba foos kilograma 35, batar kilograma lima, koto kilograma lima, fore-mungu kilograma lima no fore-keli kilograma rua.

“Karik laiha produtu hirak ne’e, bele troka ho produtu sira-seluk ho valór hanesan, ne’ebé sei entrega trimestralmente hosi órgaun no servisu sira ba benefisiáriu ne’ebé ezerse ninia funsaun,” Portavóz Governu esplika.

Projetu Dekretu-Lei ne’e sei haruka ba Prezidente Repúblika hodi hetan promulgasaun no hahú implementa iha fulan-janeiru 2022.

Daudaun ne’e totál funsionáriu públiku hamutuk 32.000, ne’ebé dezde tempu VI Governu Konstitusionál, hahú hapara rekrutamentu funsionáriu permanente sira no hahú ona haree filafali kuadru jurídiku hodi ajusta.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here