Médiku sira halo hela tratamentu ba pasiente COVID-19 ida iha sala Izolamentu Ospitál Lahane, sábadu (18/09). Imajen Tatoli/Francisco Sony.

DILI, 19 setembru 2021 (TATOLI)—Sala Situasaun Sentru Integradu Jestaun Krize (CIGC, sigla portugés), domingu ne’e rejista kazu pozitivu COVID-19 hamutuk 39, rekoperadu 251, kazu ativu 1.675 no óbitu na’in-ida (1).

Hosi númeru kazu pozitvu 39 ne’e, mane na’in-23 no feto na’in-16 ho idade tinan 20 na’in-neen (15,3%), idade entre tinan 12-59 na’in 30 (76,9%) no ho idade 60 na’in-tolu (3).

Totál óbitu ne’ebé relata ohin, mane ida ho idade 75, hela iha Dili, seidauk vasina, iha loron 13 setembru 2021, diagnóstikadu iha HNGV ho sindroma insufisiénsia respiratória aguda (SIRA) tanba COVID-19.

Notísia Relevante: COVID-19, pozitivu 51 no rekoperadu 81

“Matebian is kotu iha tuku 23:10 otl iha sala izolamentu Vera Cruz. Família kolabora ho ekipa saúde, hodi hala’o funeral tuir protokolu ne’ebé adota iha Timor-Leste,” Koordenadór Forsa Tarrefa ba Prevensaun no Mitigasaun Surtu COVID-19, Rui Maria de Araújo, hateten liuhosi nota imprensa ne’ebé Agência Tatoli asesu.

Hosi númeru pozitivu foun ohin, mai hosi Dili na’in-20 no munisipiu seluk na’in-19, ne’ebé iha 22 (60,7%) mak sintomátiku ka hatudu sintoma.

“Kazu detetadu foun ohin, 7 (18%) simu ona vasina kompletu, 7 (18%) simu ona vasina doze dahuluk. Totál kumulativu kazu konfirmadu 19.033. Totál óbitu 104,” Koordenadór Forsa Tarrefa ba Prevensaun no Mitigasaun Surtu COVID-19 ne’e relata.

Hosi horiseik mai ohin, teste ne’ebé Laboratóriu Nasionál Saúde halo hamutuk 167 PCR ho detalla hanesan Vijilánsia sentinela hitu (7), Contact tracing 11, Random Screening sia (9), Viájen sai hosi serka sanitária hosi Dili 59, Viájen internasionál 24, Follow up iha kuarentena 57.

Teste PCR ne’ebé halo horisehik (sábadu, 18/09) iha munisipiu sira seluk mak RAEOA no HNGV hamutuk 268 ho detalla hanesan Baucau 87, Ermera  na’in-hitu (7), Maliana 15, Maubisse 22, RAEOA  na’in-ualu (8), Suai 22, Viqueque na’in-sia (9), Lospalos 11 no HNGV 87.

Atu bele hatene surtu ida ninia evolusaun, nomós surtu ne’e aumenta ka diminui, indikadór ida ne’ebé matenek-na’in epidemiolojia nian uza mak insidénsia.

Konvensionalmente insidénsia sukat totál kazu foun kada loron pur 100 mil abitante no hatudu risku ne’ebé populasaun iha atu hetan da’et moras ida.

Ohin, izolamentu Vera Cruz, Lahane, HNGV no fatin seluk iha territóriu laran tomak, halo tratamentu hospitalizadu ba kazu detetadu pozitivu hamutuk 59, grave na’in-hitu (7), na’in-tolu (3) uza ventiladór, na’in-ida (1) uza Continuous Positive Airway Pressure (CPAP), no na’in-tolu (3) uza oksijéniu, moderadu 35 no leve 17.

Husu ba populasaun iha Timor-Leste laran tomak, maske simu ona vasina, favór respeita nafatin regra prevensaun no ijiéne individuál, ne’ebé Governu hatuur ona, atu prevene moras COVID-19 da’et ba-mai.

Regra sira-ne’e mak hanesan uza mascara, fase liman beibeik ho sabaun ka dezinfetante ruma,  evita kose liman ba matan, inus ho ibun,  bainhira kumprimenta malu la presiza kaer liman, bensa-liman, rei-malu ka haku’ak malu, evita halibur malu barak, hamri’ik ka tuur do’ok hosi ema seluk mínimu metru ida ho balun.

Jornalista : Antónia Gusmão

Editór      : Cancio Ximenes

HAKEREK NO HATÁN

Please enter your comment!
Please enter your name here