Médiku atende komunidade ne’ebé simu vasina AstraZeneca iha Sentru Saúde Formoza, Dili, kinta (16/09/21). Imajen Tatoli/António Gonçalves.

DILI, 18 setembru 2021 (TATOLI)—Sala Situasaun Sentru Integradu Jestaun Krize (SIJK), rejita kazu pozitivu COVID-19 hamutuk 51, rekoperadu 81 no kazu ativu 1.888.

Hosi númeru pozitivu foun ohin, mai hosi Dili na’in 25 no munisipiu seluk na’in 26, ne’ebé iha 31 (60,7%) maka sintomátiku.

Notísia relevante:COVID-19, mate ida no kazu ativu 1.918

“Kazu detetadu foun ohin, 9 (18%) simu ona vasina kompletu, 3 (6%) simu ona vasina doze dahuluk. Totál kumulativu kazu konfirmadu 18.994. Totál óbitu 103, Koordenadór Forsa Tarrefa ba Prevensaun no Mitigasaun Surtu COVID-19, Rui Maria de Araújo, hateten liu hosi komunikadu, sábadu ne’e.

Hosi horiseik mai ohin, teste ne’ebé Laboratóriu Nasionál Saúde halo hamutuk 197 PCR, ho detalla hanesan tuirmai Vijilánsia sentinela 24, Contact tracing ualu, Random Screening 50, Viájen sai hosi serka sanitária hosi Dili 94, Viájen internasionál laiha, Follow up iha kuarentena 21.

Teste PCR ne’ebé halo horiseik iha Munisipiu sira seluk, RAEOA no HNGV hamutuk 361 ho detalla hanesan tuirmai,Baucau 51, Ermera  19, Maliana 28, Maubisse 22, RAEOA  14, Suai 30, Viqueque 14, Lospalos 66 no HNGV 117.

Atu bele hatene surtu ida ninia evolusaun, nomós surtu ne’e aumenta ka diminui, indikadór ida ne’ebé matenek-na’in epidemiolojia nian uza, maka insidénsia.

Konvensionalmente insidénsia sukat totál kazu foun kada loron pur 100 mil abitante no hatudu risku ne’ebé populasaun iha atu hetan da’et moras ida.

Ohin, izolamentu Vera Cruz, Lahane, HNGV no fatin seluk iha territóriu laran tomak, halo tratamentu hospitalizadu ba kazu detetadu pozitivu hamutuk 63 grave sia, moderadu 38 no leve 16.

Husu ba populasaun iha Timor-Leste laran tomak, maski simu ona vasina, favor respeita nafatin regra prevensaun no ijiéne individuál, ne’ebé Governu hatu’ur ona, atu prevene moras COVID-19 da’et ba mai.

Regra sira-ne’e mak hanesan uza mascara fase liman beibeik ho sabaun ka dezinfetante ruma  evita kose liman ba matan, inus ho ibun  bainhira kumprimenta malu, la presiza ka’er liman, bensa-liman, rei-malu ka haku’ak malu evita halibur malu barak  hamri’ik ka tur do’ok husi ema seluk, mínimu metru ida ho balun.

Jornalista: Hortencio Sanchez

Editór: Cipriano Colo

HAKEREK NO HATÁN

Please enter your comment!
Please enter your name here