Médiku sira hala’o teste swab antigen ba jornalista destakadu iha Palásiu Governu ne’ebé hala’o iha Faról, kinta (16/09). Imajen Tatoli/Francisco Sony.

DILI, 17 setembru   2021 (TATOLI)—Sala Situasaun, Sentru Integradu Jestaun Krize (SIJK), rejista kazu mate ida,  pozitivu 87, rekoperadu 163 no kazu ativu 1.918.

Totál mate ne’ebé relata ohin, mane iha ho idade 76, hela iha Dili, seiduak vasina, iha 14 Setembru 2021, diagnóstikadu ho sindroma insufisiénsia respiratória aguda (SIRA) tanba  COVID-19, iha HNGV.

Notísia relevante:COVID-19, mate rua no ativu 1.995

“Matebian sofre mós moras diabetes. Ohin matebian i’istuku 08:45 iha Vera Cruz. Família kolabora ho ekipa saúde, hodi hala’o funerál tuir protokolu ne’ebé adopta iha Timor-Leste,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liuhosi komunikadu, sesta ne’e.

Kazu foun ohin 87, mai hosi Dili 40, Baucau 16, RAEOA 15 no munisipiu seluk hamutuk 16 kompostu hosi mane 55 no feto 32.

Hosi totál kazu detetadu foun ohin, ho idade 20, iha na’in 19 (21,8%) entre 12-59 na’in 58 (73,5%), idade 60  na’in-haat. Hosi kazu detetadu foun ohin 28 kazu  ka 32,1% sintomatiku.

Kumulativu kazu konfirmadu sura hosi 21 marsu 2020 to’o  17 setembru 2021 hamutuk 18.943. Hosi horisehik mai ohin, teste ne’ebé Laboratóriu Nasionál Saúde halo hamutuk 248 PCR, ho detallu hanesan tuir-mai, Vijilánsia sentinela na’in-hitu, rastreiu ba kontaktu ka Contact tracing  39,  Rastreiu Aleatóriu  ka Random Screening nain 37, viájen sai-hosi serka sanitária hosi Dili 119,  Viájen internasionál  26, Follow up iha kuarentena na’in 20.

Totál testes PCR ne’ebé halo horisehik 16 setembru iha munisípiu-sira seluk, RAEOA no HNGV hamutuk 358, ho detalla hanesan tuir-mai, Maubisse 19, Maliana 33, Viqueque sia, Suai 45, Baucau 78, Ermera haat, RAEOA hitu, HNGV 108 no Lospalos 55.

Totál doze vasina ne’ebé fó ona ba populasaun elijível tinan 18 ba leten, to’o ohin dader 10:00, loron 17 setembru tuir sistema informasaun Saúde iha Ministériu Saúde  ho totál  kumulativu 1ª doze iha Dili (76,3%) no  totál  kumulativu 2ª doze  iha Dili (62,9%).

Ema ne’ebé simu ona vasina doze dahuluk iha Timor-Leste  (54,9%) no simu ona doze daruak  (32,0%).

Atu bele hatene surtu ida ninia evolusaun no mós surtu ne’e aumenta ka diminui, indikadór seluk ne’ebé matenek-na’in epidemiolojia nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et moras ida.

Hosi insidénsia COVID-19 iha Timor-Leste, durante loron hitu ikus maka 6,9/100 mil abitante, enkuantu ba de’it munisípiu Dili,15,3/100 mil abitante.

Ohin, RAEOA iha insidénsia 12,9/100 mil abitante, tuir kedan ho munisípiu Baucau ho insidénsia 7,1/100 mil abitante. Hafoin ho munisípiu Lautem insidensia  6,0/100 mil abitante.

Dadus iha leten hatudu katak, insidénsia munisípiu Dili, RAEOA ho munisípiu Baucau tuir-tuir malu a’as-liu, iha Timor-Leste laran tomak, munisípiu Lautem mós hatudu risku a’as-liu, atu populasaun hetan da’et, no hada’et tutan virus SARS-CoV-2, iha komunidade nia le’et.

Iha loron 17 setembru 2021, izolamentu Vera Cruz, Lahane, HNGV no fatin seluk iha territóriu laran tomak, halo tratamentu hospitalizadu ba kazu detetadu pozitivu na’in 85,  ho detalle hanesan tuir mai grave hamutuk na’in  12, na’in-lima uza ventiladór, na’in-tolu uza CPAP-Continuous Positive Airway Pressure, haat uza oksijéniu. Moderadu hamutuk ema na’in 50. Kaman ema na’in 23.

Husu ba populasaun iha Timor-Leste laran tomak, maski simu ona vasina, favor respeita nafatin regra prevensaun no ijiéne individuál, ne’ebé Governu hatu’ur ona, atu prevene moras COVID-19 da’et ba mai.

Regra sira-ne’e mak hanesan uza mascara fase liman beibeik ho sabaun ka dezinfetante ruma  evita kose liman ba matan, inus ho ibun  bainhira kumprimenta malu, la presiza ka’er liman, bensa-liman, rei-malu ka haku’ak malu evita halibur malu barak  hamri’ik ka tur do’ok husi ema seluk, mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here