Médiku prepara hela vasina AstraZeneca hodi oferese ba komunidade iha Sentru Saúde Formoza, kinta (16/09/21). Imajen Tatoli/António Gonçalves.

DILI, 17 setembru 2021 (TATOLI)—To’o ohin loron, ema na’in 414.375, ka 55 % mak simu ona vasina kontra COVID-19, doze dahuluk iha Timor-Leste (TL), no ema na’in  241.874 (32%) mak simu ona doze daruak.

“Governu kontinua fornese vasina ba COVID-19 iha sentru saúde sira no fatin imunizasaun sira ne’ebé mak defini ona iha teritoriu Timor-Leste tomak, ho kampaña surtu-la’o daudaun iha munisípiu Liquiça no Alieu,” Portavós Komisaun Interminsiteriál Implementasaun Vasina kontra COVID-19, Danina Coelho, hateten liu hosi konferénsia imprensa, iha salaun MSSI, Caicoli, sesta ne’e.

Notísia relevante:MD kontinua enkoraja populasaun Bobonaro simu vasina

Maski TL iha ona progresu iha kobertura vasina, espesialmente iha Dili, RAEOA, Covalima no Viqueque, maibé munisípiu balun sei iha protesaun ne’ebé kiik tebes, inklui Ermera, Aileu no Ainaro, ne’ebé menus hosi porsentu 35, hosi populasaun adultu mak vasina ona, ho doze dahuluk.

Desde inísiu pandemia ne’e, rejista ona ema mate hamutuk 102 iha Timor-Leste, no fulan agosto mak sai fulan ne’ebé todan, hosi inísiu fulan agosto to’o 17 setembru, ema mate hamutuk na’in 76.

“Maioria mate ne’ebé akontese, ema sira ne’ebé seidauk simu vasina,” Danina Coelho, hateten.

Governu rekomenda ona ba inan sira ne’ebé fo-susu atu simu vasina AstraZaneca no la presiza atu para fó-susu hafoin simu vasina.

Maski nune’e, parte komisaun inteministeriál mós agardese tebes ba sira ne’ebé mak oferese ona vasina hosi Governu  Austrália, Xina, Japaun, Nova Zelándia, Portugál no mós  Fasilidade COVAX, tanba ajuda ona povu TL hamutuk 1.112.650 mak simu ona vasin akontra COVID-19.

To’o oras-ne’e TL rejista ona kazu konfirmadu COVID-19  hamutuk  18.856  no mate hamutuk 103.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here