Diretór Ezekutivu IADE, Filomeno Belo. Imajen TATOLI/Francisco Sony

DILI, 09 setembru 2021 (TATOLI)—Diretór Ezekutivu Institutu Apoiu Dezenvolvimentu  Emprezariál (IADE), Filomeno Belo, hateten, institutu ne’e husu adisionál millaun $1,4 ba tinan oin hodi finansia programa inkubasaun negósiu, ne’ebé hanesan apoiu ba negosiante hodi inisia negósiu.

“Tetu fiskál IADE ba Orsamentu Jerál Estadu (OJE) 2022 hamutuk $984.000, ami husu adisionál $480.000, atu bele sai millaun $1,4 atu fó prioridade ba atividade emprezáriu  sira, liuliu ba sira ne’ebé ami bolu programa fasilidade inkubasaun negósiu,” Diretór Ezekutivu IADE, informa ba Agência TATOLI, iha resintu Ministériu Finansa, Aitarak-laran, kinta ne’e.  

Notísia relevante: IADE hala’o formasaun negósiu ba formadór AEMTL

Programa ne’e atu fó insentivu ba média no pekena empreza sira hodi bele eleva etividade negósiu.

“Ita fó apoiu materiál no karik kapitál atu haboot liután sira-nia negósiu, maibé tuir prosesu selesaun ne’ebé bazeia ba idea negósiu no tuir kritériu ne’ebé IADE estabelese,” nia akresenta.

Iha tinan 2020, IADE fó formasaun ba ema hamutuk 170, nune’e emprezáriu sira bele halo jestaun ba negósiu.

Proposta orsamentu IADE ba tinan 2021 ho montante $1.228.000, kompostu hosi saláriu no vensimentu $578.454, bens no servisu $510.486 no kapitál menór $139.060.

Programa prinsipál setorál mak promove inisiativa apoiu dezenvolvimentu emprezariál hodi benefisia  ba setór mikro, pekena no média empreza no reforsa kapasidade jestaun no planeamentu negósiu (elaborasaun planu  negósiu)  no  literasia finansia.

Nune’e mós, kontribui atu garantia sustentabilidade no rendimentu negósiu hodi kontribui kreximentu ekonomia, promove boa governasaun no  jestaun institusionál, fortalesimentu kapasidade rekursu umanu.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here