Vise-Ministru Edukasaun, Juventude no Desportu, António Guterres, inaugura kanalizasaun bee-mos iha EBF Golgota, suku Bahu, sesta (17/09). Imajen TATOLI/Natalino Belo

BAUCAU, 17 setembru 2021 (TATOLI)–Ministru Edukasaun, Juventude no Desportu (MEJD) ho parseria United Nations Children’s Fund (UNICEF) apoiu fundu $1.000 ba Eskola Bázika Filial (EBF) Golgota, iha suku Bahu, postu Baucau villa, munisípiu Baucau, hodi kanaliza bee-moos.

Tanba ne’e, Vise-Ministru Edukasaun, Juventude no Desportu, António Guterres, halo inaugurasaun ba instalasaun infraestrutura.

“Fundu kiik maibé sira uza duni ho di’ak hodi kanaliza bee-moos mai eskola, tanba durante tinan 10 nia laran EBF Golgota enfrenta problema bee-mos no dalaruma sira sosa, maibé ohin sira sente haksolok tanba asesu ona bee-moos, ne’ebé hanesan ai-rin ba edukasaun no importante ba ita-nia moris loron-loron,” Vise-Ministru, hateten, hafoin seremónia inaugurasaun iha EBF Golgota suku Bahu, sesta ne’e.

Notísia relevante: Bee-mos sai prioridade ba suku Bahu iha Baucau

Governante ne’e agradese ba inan-aman ne’ebé kontribui ajuda kanaliza bee-moos no apresia tanba maski montante orsamentu kiik, maibé konsege halo duni buat di’ak.

“Bainhira ita uza la kuidadu osan $1.000, ita bele gasta loron ida bele hotu, maibé bee hela ba tinan naruk,” nia akresenta.

Iha biban hanesan, Koordenador EBF Golgota, Ana Floriana dos S. Marques, agradese ba MEJD tanba aprova ona proposta kanaliza bee-moosm tanba tinan barak ona eskola ne’e enfrenta problema bee-moos.

“Ami agradese ba edukasaun munisipál no nasionál tanba bele aprova ami-nia proposta hodi dada bee-mos atu responde ba preokupasaun estudante sira-nia ne’ebé loron-loron sempre lori bee hosi uma” nia dehan.

Seremónia ne’e partisipa hosi Reprezentante UNICEF, Diretór Edukasaun Baucau, Augusto Ornai Ximenes, líder komunitáriu inklui inan-aman no estudante sira.

EBF golgota iha suku Bahu ho totál estudante hamutuk 212, profesor hamutuk na’in-hitu, kompostu hosi permanente tolu, kontratadu tolu no parsiál ida.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here