Xefi suku Bahu, postu Baucau Villa, munisípiu Baucau, Manuel Francisco Rodrigues Gusmão. Imajen TATOLI/Natalino Belo

BAUCAU, 21 juñu 2021 (TATOLI)–Xefe suku Bahu, postu administrativu Baucau Villa, munisípiu Baucau, Manuel Francisco Rodrigues Gusmão, hateten, bee-mos sai prioridade ba suku ne’e, ne’ebé sei realiza liuhosi Planu dezenvolvementu Intergradu Munisipál (PDIM) tinan 2021 to’o 2022.

“Planu ne’e no ninia fundu rekuperasaun ekonómika halai liu ba turizmu komunitária, maibé prioridade liu mak bee-mos ba aldeia Ana-ulo no Ro-ulo,” Xefe suku Bahu informa ba Agência TATOLI, iha ninia knaar fatin, Bahu, segunda ne’e.

Ba kestaun ne’e, autoridade lokál suku ne’e hato’o ona pedidu liuhosi reuniaun Konsellu Koordenasaun Munisipál (KKM) hodi ajusta ho PDIM ligadu ba nesesidade komunidade.

Benefisiáriu bee-mos hosi aldeia Ana-ulo no Makadae hamutuk  431, ne’ebé sei asesu hosi fundu PDIM.

“Planu ba 2021 no 2022, tuir loloos prosesu hala’o ona maibé tamba de’it ita-nia kondisaun no situasaun atuál hanesan Estadu Emerjénsia no Serka Sanitária mak ita labele halo movimentu,” nia akresenta.

Liuhosi programa PDIM, suku Bahu tau prioridade mós ba dezenvolve fatin turizmu komunitária istóriku, kulturál no turizmu globál hanesan komunidade ein jerál.

Turizmu komunitária iha área tasi nian, istóriku mak fatin subar líder Forsa FALINTIL sira no istóriku mak fatin subar statua Santo António inklui gruta Uainiki.

Suku Bahu iha aldeia lima hanesan Ana-ulo, Ro-ulo, Boi-lé, Makadae no Lamegua, ho totál populasaun hamutuk 11.562.

Jornalista : Natalino Belo

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here