Sekretáriu Estadu Protesaun Sivíl (SEPS), Joaquim Gusmão. Imajen Tatoli/Nelson de Sousa.

DILI, 17 setembru 2021 (TATOLI)—Sekretária Estadu Protesaun Sivíl (SEPS), kontinua koordena ho autoridade munisípiu Dili, hodi halo aprosimasaun ba família 16 ne’ebé daudaun kontinua hela iha sentru akollamentu, no iha ona konkordánsia atu husik hela fatin hirak ne’e.

“Ita halo aprosimasaun ba maluk-sira iha sentru akollamentu, to’o horisehik família 16 iha sentru akollamentu Manleuana no Hera prontu atu muda ba ida-idak nia hela-fatin,” SEPS, Joaquim Gusmão, hateten ba jornalista iha knaar fatin, Caicoli, sesta ne’e.

Notísia relevante:MI-SEPS sosializa lei protesaun sivíl iha Bobonaro

Família hirak-ne’e uma laiha ona, tanba antes ne’e hela iha fatin risku dezastre hanesan mota ninin, foho lolon no ida-idak identifika ona fatin atu muda iha Dili no fila ba munisípiu.

Tanba ne’e, SEPS koordena ho autoridade munisípiu Dili  atu verifika fatin seguru ne’ebé laiha risku ba dezastre iha tempu oin mai, nune’e  SEPS sei apoia materiál konstrusaun ho osan mão de obra hodi harii fali uma.

Tuir mekanizmu ne’ebé iha, SEPS sei la fó apoiu rekoperasaun ba família hodi kontinua harii fali uma iha fatin risku no bainhira familia identifika fatin ne’ebé laiha risku maka sei fó apoiu.

Família ne’ebé buka rai ka fatin laiha atu hela, ne’e la’ós kompeténsia SEPS nian, tanba ne’e Governu foti ona desizaun maka bainhira akontese dezastre iha 04 abríl, Konsellu Ministru hasai rezolusaun ida ba ekipa interministeriál ne’ebé lidera hosi Ministériu Planu Ordenamentu (MPO), hodi buka fatin temporáriu atu bele kria fatin halo re-alokamentu ne’ebé daudaun nia prosesu la’o hela.

Papél SEPS maka, antes dezastre halo mitigasaun no prevensaun bainhira akontese dezastre tenke fó apoiu lalais hodi salva sidadaun.

Bainhira udan, tenke buka fatin seguru

SEPS Joaquim Gusmão mós apela ba populasaun ne’ebé hela iha fatin risku, bainhira udan no anin boot ho durasaun kleur tenke salva vida antes, liuliu sira ne’ebé hela iha mota ninin, foho-lolon no lagoa ninin.

Apelu ne’e relasiona ho previzaun metrolojia hosi Austrália katak, iha alerta ba Timor-Leste posibilidade sei akontese fenomemu La Niña, iha fulan outubru to’o tinan oin, sei akontese udan no anin boot.

“Bainhira udan no anin makas liu ona minutu 45, tenke dook ona hosi hela fatin ba fali fatin seguru, nune’e bainhira mosu dezastre salva vida,” Governante ne’e hateten.

SEPS kontinua hala’o atividade alerta direita ba komunidade no  hosi kanál mídia órgaun komunikasaun sosiál, hodi tau atensaun ba prevensaun.

Atividade seluk maka serbisu hamutuk ho liña ministéiru seluk, atu kontinua sensibiliza kona-bá importánsia ambiente, hodi labele tesi  ai arbiru  iha foho lolon, mota ninin hodi fó protesaun rai labele halai.

Família hitu iha Bebonuk simu ona apoiu

SEPS oferese ona apoiu umanitáriu ba família sira  hamutuk hitu ne’ebé hela besik tasi-ibun otél arbiru, Bebonuk iha loron hirak liu ba anin no laloran tasi boot tama uma hodi estraga sasan.

SEPS to’o kedan fatin hodi fó apoiu umanitáriu no atu muda temporáriu família sira ne’e ba iha eskola Bebonuk, maibé família sira ida-idak deside hela de’it ho família.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here