Autoridade munisipál Bobonaro, administradór postu sira, PNTL, F-FDTL, Bombeiru, kargu xefia-sira, seguransa sivíl, funsionáriu no autoridade lokál, partisipa iha sosializasaun lei protesaun sivíl, iha administrasaun Bobonaro, tersa (14/09). Imagen Tatoli/Sérgio da Cruz.

BOBONARO, 14 setembru 2021 (TATOLI)—Ministériu Interiór (MI) ho Sekretáriu Estadu Protesaun Sivíl (SEPS), sosializa lei protesaun sivíl númeru 12/2020 ba entidade relevante iha munisípiu Bobonaro.

Sosializasaun ne’e, atu introdúz papél protesaun sivíl nian, kona-bá mekanizmu prevensaun ba dezastre no kalamidade.

Notísia relevante:SEPS kontinua sosializa Lei Protesaun Sivil iha Baucau

“Lei protesaun sivíl importante atu kompleta sistema seguransa nasionál. Ita iha lei defeza nasionál ne’ebé ita nia forsa armda-sira komunga hela. Alende ne’e, iha lei seguransa interna ne’ebé PNTL komunga hela, ikus liu tinan 10 ona mak foin kompleta lei protesaun sivíl, atu ezekuta sistema serbisu integradu iha seguransa nasionál. Lei ne’e ne’e rasik, ho objetivu ida de’it atu proteze sidadaun-sira no asegura sira-nia riku-soin,” Diretór Jerál Protesaun Sivíl, Superintendente, Ismael da Costa Babo, hateten iha salaun administrasaun munisipál Bobonaro, tersa ne’e.

Lei númeru 59 ho totál kapitulu hitu, fó kompeténsia ba protesaun sivíl deklara alerta no kontijénsia ba komunidade, bainhira akontese dezastre no kalamidade-ruma.

Lei ne’e mós sai pontu importante, obriga entidade tomak, atu koopera-malu mós ho munisípiu no país viziñu-sira  iha situasaun emerjénsia ruma, hodi salva populasaun hosi dezastre, tanba ne’e entidade relevente iha devér no obrigasaun atu banati-tuir.

Diretór Diresaun Transporte Terrestre (DTT) Bobonaro, José Paulo Henrique Baptista, konsidera lei ne’e importante ba ema hotu, hodi proteze sidadaun-sira, bainhira mosu dezastre ruma.

“Ita ko’alia konseitu protesaun sivíl, signifika akomoda ema hotu bainhira enfrenta situasaun dezastre naturál. Entidade hotu bele kolabora hamutuk fó apoiu ba malu, tanba ne’e ha’u hanoin autoridade munisipál tenke atensaun, integra iha serbisu ba oin, ita bele salva ema nia-vida,” nia hateten.

Parte DTT, lei ne’e sita liu ba kódigu estrada, maibé la temi kona-bá dezastre seguru, tanba ne’e ba oin sei aprezenta planu atu bele konsidera, hodi hamosu integrasaun ba lei ne’ebé garante seguru ba ema nia movimentu iha estrada, ligadu ho dezastre naturál.

Lei protesaun sivíl enkuadra iha sistema integradu seguransa nasionál nian, protesaun sivíl ne’ebé mai hodi kompleta, halo papel fundamentál, importante iha prevensaun ho resposta ba situasaun asidente, katástrofe ka kalamidade ne’ebé mai hosi nia hahalok ka natureza haree hosi gravidade determina oinsa atu halo asaun lalais, hodi salva populasaun iha perigu nia laran, to’o fó fila-fali iha situasaun normál moris nian ne’ebé afeta hosi situasaun dezastre-sira iha tempu badak nia laran.

Iha definisaun jerál artigu 1 hateten:

  1. Protesaun sivíl ne’e atividade ne’ebé dezenvolve hosi Estadu, iha Rejiaun Administrativa Espesiál Oe-cusse Ambeno (RAEO), hosi munisípiu, populasaun ho entidade públika-privada ho finalidade atu prevene risku koletivu hamutuk kona-bá situasaun asidente grave-sira hanesan, katástrofe, hodi hamenus efeitu, proteje ho sokorru ba ema no sasan ne’ebé iha perigu nia laran.
  2. Atividade protesaun sivíl ne’e permanente, multidisiplinár ho multisetorál, ne’ebé kompete ba organizmu admistrasaun públika hotu-hotu, atu buka haka’as an hodi promove kondisaun hotu ne’ebé presija atu diskute no halo sem prezudika kna’ar apoiu mútuo, hamutuk entre organizmu ho entidade ne’ebé nível hanesan ka nível boot liu.
  3. Atividade prevee iha planu prevensaun nian, kontijénsia ho emerjénsia-nian ba nívél atuasaun oioin.

Lei ne’e aprovadu iha 21 jullu 2020, hosi Prezidente Parlamentu Nasionál (PPN), Aniceto Longuinhos Guterres Lopes no hetan promulgasaun hosi Prezidente Repúblika (PR), Fransisco Guterres Lú-Olo, iha 29 novembru 2020.

Lei ne’e tama vigór, iha loron primeiru fulan tuir-mai kedan hosi nia loron publikasaun.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here