Prezidente Autoridade Nasionál Komunikasaun, João Olívio Freitas. Imajen TATOLI/ Francisco Sony

DILI, 15 juñu 2021 (TATOLI)–Prezidente Autoridade Nasionál Komunikasaun (ANC, sigla portugés), João Olívio Freitas, informa, fulan ne’e autoridade aplika multa ba operadór Telemor no Telkomcel tanba komete infrasaun.

“Loke prosesu administrativu kontra ordenasaun ba operadór telekomunikasaun Telemor no Telkomcel, ne’ebé Konsellu Administrasaun deside haruka selu multa $223.200, la’ós kiik, sira tenke selu ba kofre Estadu liuhosi ANC,” Prezidente ANC informa iha salaun Caicoli, tersa ne’e.

Prosesu ne’e bazeia ba atendindimetu operadór ba konsumidór lahó di’ak no ikus mai hetan reklamasaun barak, tanba ne’e ANC deside loke prosesu hasoru operadór.

“Ita ko’alia hanesan rejistrasaun sim card, tanba ami fó ona sira hosi loron 28 maiu, durante loron 45 ba operadór atu asegura kartaun ne’ebé fa’an iha dalan ninin tenke rejistradu ho ema ida nia naran, maibé hafoin loron ne’ebé determina ami identifika faktu iha terrenu katak iha kartaun ho númeru la rejistadu, maibé bele utiliza. Tanba ne’e ami loke prosesu administrativu hasoru operadór ba kestaun ne’e,” Prezidente ANC esplika.

Nia dehan, prosesu administrativa ANC loke bainhira komprovadu katak operadór ida halo infrasaun hasoru artigu sira ne’ebé maka hatuur iha dekretu-lei númeru 15/2012, 28 marsu kona-ba kompeténsia autoridade.

“Multa iha prosesu administrasaun ne’ebé maka ita loke hasoru operadór rua tanba utiliza rekursu telekomunikasaun, liu-liu espetru frekuénsia lahó lisensa, tanba ne’e ami loke prosesu hasoru sira no tenke selu multa,” nia akresenta.

Operadór telekomunikasaun Telemor selu ona ninia multa balun, maibé sei falta balun.

“Sira selu uluk ona $74.400, maibé sei falta tan $ 140.000, hela de’it Telkomcel mak seidauk, ne’e hanesan Konsellu Administrasaun nia desizaun, la’ós Prezidente nia desizaun no posibilidade iha fulan ida-ne’e nia laran ami sei foti tan desizaun,” nia hatutan.

Jornalista   : Natalino Costa

Editora       : Julia Chatarina

HAKEREK NO HATÁN

Please enter your comment!
Please enter your name here