Vise-Ministru, António Guterres, hala’o inaugurasaun ba edifísiu pré-eskolár komunitária iha suku Nahareka, postu administrativu Ossu, munisípiu Viqueque, ne’ebé finansia no konstrui hosi Governu Nova Zelándia, liu hosi Organizasaun mundiál Fundu ba Infánsia, kinta (16/09/21). Imajen Tatoli/ Vitorino Lopes da Costa.

VIQUEQUE, 16 setembru 2021 (TATOLI)—Ministériu Edukasaun Joventude no Desportu (MEJD), liu hosi Vise Ministru, António Guterres, hala’o inaugurasaun ba edifísiu pré-eskolár komunitária iha suku Nahareka, postu administrativu Ossu, munisípiu Viqueque, ne’ebé finansia no konstrui hosi Governu Nova Zelándia liu hosi Organizasaun mundiál Fundu  ba Infánsia.

Inaugaurasun ne’e, António Guterres akompañadu hosi Embaixadór Nova Zelándia iha Timor-Leste (TL), Philip Hewitt.

Notísia relevante:MEJD sosializa programa ‘Eskola ba Uma’ iha Viqueque

António Guterres haktuir, konsidera  pré-eskolár importante ba labarik sira hodi apreende ho livre no prepara baze metin ba jerasaun foun sira iha rai ne’e.

“Pré-eskolár nu’udár baze fundamentu eduksaun ba la barik sira, liuliu iha nasaun ne’e,” Antánio  Guterres hateten, kinta ne’e.

Pré-eskolár sira ne’ebé eziste iha oin rua mak hanesan pré-eskolár públiku no pre-eskolár komunitária ho nia ezisténsia hanesan alternativa sustentanbilidade ba prosesu aprendisajen, tanba ne’e Governu sei tau-matan tuir dekretu lei númeru 3/2016 ne’ebé delega kompeténsia ba munisípiu.

Nune’e mós Embaixadór Nova Zelándia iha TL, Philip Hewitt,  espresa katak, Governu Nova Zelándia kontente ba konstrusaun pré-eskolár ne’ebé kualidade, hodi labarik sira utiliza ba prosesu aprendizazen.

Tanba ne’e, nia promete katak, Governu Nova Zelándia sei kontinua apoia TL iha área edukasaun, iha futuru.

Iha fatin hanesan, Xefe Suku Nahareka, Paulino Ximenes, agradese ba Governu Nova Zelándia tanba bele fó apoiu hodi konstrui edifísiu ne’ebé ho sala-de-aula ida, ho orsamentu $2.500.

“Autoridade suku nafatin fó apoiu ba edukasaun iha ami-nia suku. Ami mós hakarak ami-nia oan sira asesu ba edukasaun. Tanba ne’e ami sei asegura fasilidade eskola,” Paulino Ximenes agradese.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here