Vise-Ministru Edukasaun Joventude no Desportu (MEJD), hala’o lansamentu no sosializasaun kona-bá aprendizanzen distánsia hosi programa 'Eskola ba Uma' ba profesór-sira iha munisípiu Viqueque, tersa (14/09/21). Imajen Tatoli/ Vitorino Lopes da Costa.

VIQUEQUE, 14 setembru 2021 (TATOLI)—Ministériu Edukasaun Joventude no Desportu (MEJD), hala’o sosializasaun kona-bá aprendizanzen distánsia hosi programa ‘Eskola ba Uma’ ba profesór-sira iha munisípiu Viqueque.

“Maski programa ne’e foun ba ita iha Timor-Leste, maibé ita tenke integra-an ba programa online hodi ajuda estudante-sira aprende nafatin iha situasaun pandemia COVID-19,” Vise Ministru Edukasaun Joventude no Desportu (MEJD), António Guterres, hateten ba Agência Tatoli, iha salaun munisípiu Viqueque, tersa ne’e.

Notísia relevante:PN konsidera programa eskola ba uma la efetivu

MEJD konsidera Edukasaun mak save importante ba futuru nasaun, maibé situasaun pandemia COVID-19 difikulta prosesu aprendizazen ne’ebé Governu tenke suspende atividade eskolár durante fulan ualu, ba eskola iha territóriu hamutuk 1.080, ho estudante na’in 30.093.186 tenke iha uma de’it.

Parte MEJD haree katak, atu implementa programa Eskola ba Uma ho diak no susesu tenke iha fasilidade lubuk ida ne’ebé presija tau matan, mak hanesan eletrisidade tanba iha suku 76 mak seidauk asesu ba eletrisidade no profesór barak mak seidauk iha telemóvel android inklui estudante-sira.

Iha fatin hanesan, adiminitradór munisípiu Viqueque,  Januário Soares Bolly rekoñese katak, progrema Eskola ba Uma ne’e foun duni, maibé hakarak ka lakohi tenki tuir duni evolusaun sira ne’ebé agora dadaun iha tanba iha situasaun COVID-19, estudante barak mak lakon matéria.

Partisipa iha lansamentu no sensibilizasaun matadalan apredisajen distánsia hosi reprezentante UNICEF diretór eskola no koodenadór eskola-sira iha munisípiu Viqueque.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here