Ilustrasaun ema tuir formasaun. Imajen/Espesiál.

DILI, 15 setembru 2021 (TATOLI)—Diretór Sentru Treinamentu Vokasionál Juventude (STVJ) Comoro, Norberto da Costa informa, kuarta ne’e STVJ Comoro halo ona avaliasaun no hasoru malu ho benefisiáriu na’in-30 kona-bá abertura formasaun movel iha munisípiu Covalima iha semana dahuluk fulan-outubru nian.

Notísia Relevante: STVJ Comoro suspende realiza formasaun movel iha Covalima

“Agora ami iha Covalima hela no dadaun ne’e ami halo ona avaliasaun ho benefisiáriu Covalima nian kona-bá oinsá atu implementa formasaun movel ne’e. Formasaun ne’e sei halao iha semana dahuluk fulan-outubru nian ne’e, ami implementa ona,” Norberto da Costa hateten ba Agência Tatoli, via telefónika, kuarta ne’e.

Aleinde hasoru malu ho benefisiáriu na’in-30, STVJ Comoro hasoru malu mós ho Diretór Sekretária Estadu Formasaun Profesionál Empregu (SEFOPE) no koordenadór ba benefisiáriu formasaun movel nian, hodi ko’alia kona-bá prosesu realizasaun ba formasaun movel ne’ebé sei hala’o iha munisípiu Covalima.

“Ami hasoru malu ho Diretór SEFOPE ko’alia kona-bá oinsá atu organiza servisu balun liga ho abertura ba formasaun movel ne’e. Alende ne’e ami mós hasoru malu ho koordenadór ba benefisiáriu sira, atu nia informa fila-fali ba nia membru sira hotu, liga ba prosesu ne’ebé mak atu implementa inklui mós loron ba realizasaun formasaun movel nian,” nia dehan.

Tuir planu ne’ebé iha, STVJ Comoro sei realiza formasaun movel iha munisípiu Covalima iha fulan outubru domingu dahuluk nian.

Entretantu totál benefisiáriu ne’ebé sei tuir formasaun movel hamutuk na’in-30, ne’ebé mai hosi negosiante sira-ne’ebé halo atividade negósiu iha Covalima no hosi númeru ne’e kompostu hosi joven no kaben-na’in sira.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here