Ilustrasaun ema tuir formasaun. Imajen/Espesiál.

DILI07 setembru 2021 (TATOLI)—Diretór Sentru Treinamentu Vokasionál Juventude (STVJ) Comoro, Norberto da Costa, informa STVJ suspende formasaun movel iha munisípiu Covalima tanbá Governu implementa hela konfinamentu domisiliáriu iha Dili.

Notísia Relevante: STVJ Comoro sei realiza formasaun movel ba negosiante 30 iha Covalima

“Formasaun movel ne’e, ami sei pendente hela tanba tuir lolos ne’e, ami ba halo ona aproximasaun iha semana ida-ne’e maibé tanba konfinamentu domisiliária presiza teste swab dala rua, entaun ami tenke pendente hotu ami-nia atividade formasaun movel ne’e,” Norberto da Costa, hateten ba Agência Tatoli, via telefónika, tersa ne’e.

Formasaun movel ne’e, lolos hala’o ona iha fulan setembru ne’e maibé la konsege realiza tanba konfinamentu domisiliária ne’ebé bandu ema labele sai hosi Dili ba Munisípiu.

Daudaun ne’e formadór sira prepara hela matéria ba formasaun movel no bainhira konfinamentu domisiliária ne’e termina ona, STVJ Comoro sei ba munisípiu Covalima, hodi realiza formasaun movel ne’e.

“Matéria ne’ebé ami atu fó iha formasaun movel ne’e mak oinsá atu halo atendimentu ba custume servise nian, halo seting table nian hanesan arma meza no oinsá atu halo prosesamentu ba produtu lokál balun ne’ebé mak sira iha,” nia informa.

Totál benefisiáriu ne’ebé sei tuir formasaun movel ne’e hamutuk na’in-30, ne’ebé mai hosi negosiante sira-ne’ebé halo atividade negósiu iha Covalima. Hosi númeru ne’e kompostu hosi joven no kaben-na’in sira, ne’ebé sei fó formasaun hosi formadór na’in-rua (2) hodi fó matéria kona-bá ospitalidade.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here