Membru Parlamentu Nasionál tuir abertura ba sesaun IV lejislativa hosi V lejislatura Parlamentu Nasionál, Iha salaun Plenaria Parlamentu, kuarta (15/09). Imajen Tatoli/Francisco Sony.

DILI, 15 setembru 2021 (TATOLI)–Iha Sesaun Lejizlativa datoluk hatudu produtividade aas, nune’e Parlamentu Nasionál retoma fali kontinuidade V Lejizlatura ho IV Sesaun Lejizlativa hosi loron 15 setembru 2021 to’o 15 jullu 2022.

Notísia Relevante: Prezidente Repúblika la partisipa abertura sesaun lejizlativa foun

Prezidente Parlamentu Nasionál Prezidente Ein-Ezersísiu, Deputada Maria Angelina Lopes Sarmento ne’ebé loke sesaun lejizlativa foun ne’e esplika, kada sesaun lejizlativa hatudu nia nivel produtividade, iha nia dezafiu no nia dinámika sira oinsá hasoru no fó solusaun ba dezafiu sira, nune’e komprimenta ba devér konstitusionál no rejimentál.

“Ha’u informa jerál deit katak Parlamentu Nasionál rejista produtividade ida-ne’ebé as no hasoru dezafiu boot lubuk ida interna iha órgaun reprezentativu ida-ne’e no iha Estadu tomak ne’ebé hatudu orgullu husi parte ida no kontesta kapasidade no vontade polítika Deputadu sira hosi parte seluk,” Prezidente Parlamentu Nasionál Ein-Ezersísiu ko’alia iha sesaun lejizlativa dahaat ne’e, iha uma fukun, kuarta ne’e.

Nune’e mós Parlamentu Nasionál iha mós responsabilidade atu atualiza ba públiku, ba sidadaun sira ka ba povu tomak, nia empeñamentu no nia dezempeñu durante sesaun lejizlativa ida-ne’e, tanba Povu mak na’in ba soberania no na’in ba podér polítiku iha Estadu ida-ne’e no ne’e mak fundamentu ba Parlamentu Nasionál nia responsabilidade atu relata ba Povu saida mak nia halo no hasoru durante Sesaun Lejizlativa ida.

Iha Sesaun Lejizlativa ba datolu ne’ebé ita foin remata ne’e, Prezidente Parlamentu Nasionál sei aprezenta ba Povu liuhosi reprezentante sira iha órgaun soberania ida-ne’e, relatóriu anuál kona-ba produtividade, lala’ok no dezafiu sira-ne’ebé Parlamentu Nasionál hasoru, ne’ebé sei fahe ba Deputadu sira iha tempu badak.

Parlamentu Nasionál rekoñese katak relatóriu ne’e seidauk aprezenta forma ida ideál, tanba seidauk hetan relatóriu anteriór ruma ne’ebé sai nu’udar referénsia. Maibé, ho kontribuisaun hosi Deputadu sira sei hadi’ak liután iha relatóriu sira tuir mai.

Haktuir ba mandatu Konstitusionál nu’udar órgaun soberania daruak iha nasaun ida-ne’e, iha parte halo lejizlasaun nian Parlamentu Nasionál hatudu produtividade aas hodi aprova lei importante lubuk ida hosi Komisaun Espesializada Permanente sira durante sesaun lejizlativa ida-ne’e, inklui mós durante períodu resesu.

Hosi sorin seluk, iha parte fiskalizasaun nian hasoru dezáfiu lubuk ida tanba ho pandemia COVID-19 ladún fó biban di’ak ba deputadu sira atu hala’o kna’ar ida-ne’e iha terrenu no halo sirkulasaun ba munisípiu to’o postu sira, hodi haree implementasaun programa no orsamentu iha setór oioin.

Iha Sesaun Lejizlativa ida liubá, Parlamentu Nasionál mós lakon nia ema ida, Deputadu Saudozu Sabino Soares “Guntur” hosi Partido Libertação Popular (PLP), funsionáriu ida, Juvenal Fraga no ikus Asesór Internasionál Pedro Andrade, no lubuk ida mak sofre moras ka infetadu ho SARS-COV-2 ka COVID 19.

“Situasaun ida-ne’e fó hanoin mai ita hotu katak, maske ita hala’o ita-nia funsaun polítika ho aproximasaun no karáter oioin, ita hotu vulnerável ba vida saudável iha períodu pandémiku COVID-19 ne’ebé dezafia ita iha aspetu oioin no moras seluk ne’ebé bele ataka ita liuhosi ita-nia komportamentu moris no hanoin ne’ebé deskontroladu,” nia esplika.

Ba Sesaun Lejizlativa ida-ne’e to’o dezembru hein katak, Parlamentu Nasionál sei fó prioridade ba lei hirak-ne’ebé mak iha prosesu debate no finalizasaun hanesan Lei Enkuadramentu Orsamentál, lejizlasaun iha área Justisa hanesan organizasaun judisiária, estatutu Ministériu Públiku no Majistradu Judisiál no Lejizlasaun ba Podér Lokál.

“Hein katak ba oin ita hotu komprometidu ba Parlamentu Nasionál ne’ebé saudável, étiku no dignu. Lori Meza Parlamentu Nasionál nia naran, ha’u dezeja bom traballuu no susesu ba ita hotu no ba Povu Timor-Leste iha Sesaun Lejizlativa ida-ne’e to’o ramata,” nia dehan.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here