Konferénsia imprensa LFTL. Imajen Tatoli/Dok

DILI, 15 setembru 2021 (TATOLI) – Diretór Finansas Liga Futeból Timor-Leste (LFTL), Caetano Cárceres hateten, laiha “lójika” Federasaun Futeból Timor-Leste (FFTL) husu submete uluk relatóriu no kontratu funsionáriu hotu hafoin transfere orsamentu operasionál ba liga durante fulan hirak ba kotuk.

Notísia Relevante : Komunikasaun FFTL ho LFTL ladún armonia

“Tansá mak FFTL seidauk halo transferénsia osan mai iha LFTL husu fali ami atu haruka uluk kontratu funsionáriu sira nian ho relatóriu. ‘lójika’ ka lae, seidauk iha osan, ita halo ona relatóriu, seidauk simu osan ,ita halo relatóriu ne’e iha FFTL maibé liga aprende hosi zero mak sa’e mai ne’ebé ami hatene sistema, ami hatene prosesu,” Caetano Cárceres ba jornalista-sira iha edifísiu LFTL, Dili, kuarta ne’e, hodi responde ba deklarasaun Sekretáriu Jerál FFTL nian hodi la transfere osan hosi Governu nian ba liga.

Nia dehan, Sekretáriu Jerál FFTL, Nelio Isaac Sarmento ko’alia jerál liu ba osan atividade nian, maibé objetivu LFTL husu la’ós ba osan jogu, maibé osan operasionál hodi selu funsionáriu hotu no servisu administrasaun nian ne’ebé funsiona kedan hosi janeiru to’o ohin loron.

“Governu haruka mai ne’e 40% mak uluk ba osan operasionál nian, osan jogu nian 60% sei haruka ikus bainhira atividade sira la’o ona relatóriu hosi osan operasionál nian ami manda ba ona mak sira foin haruka osan 60% ne’e mai hodi finansia ba atividade jogu, maibé osan ne’e liu fali hosi FFTL buat hotu oin-seluk fali, durante époka lima (5) ona ami organiza buat hotu lao di’ak,” nia dehan.

Daudauk ne’e funsionáriu hotu iha LFTL durante fulan ualu (8) ona seidauk simu saláriu no material ba servisu administrasaun mós laiha inklui kombustivel ba transporte hodi halo operasaun ba servisu liga nian mós laiha.

Tenke trata futeból hanesan filozofia FIFA nian

Observadór futeból iha Timor-Leste, Lexy Vong hateten, futeból ba ema hotu hahú hosi ain-tanan to’o sa’e aviaun no desportu ne’ebé besik liu ba komunidade mak futeból, ho nune’e, tenke trata asuntu futeból tuir filozofia Federation International Football Association (FIFA) nian.

Lexi Vong husu nafatin ba órgaun Liga Futeból Timor-Leste (LFTL) no Federasaun Futeból Timor-Leste (FFTL) atu tur hamutuk rezolve problema ne’ebé iha atu lori futeból ba oin no realiza jogu iha époka ne’e.

“Futeból la haree ba o nia estratefikasaun iha estrutura organizasaun, futeból ema hotu nian ita tenke rona ema sira asionista triste hanesan Boavista hakiduk tanba saida parte rua hanesan FFTL-LFTL tenke buka rezolve situasaun sira ne’e, tenke hakuak sira, sira ne’e asionista, sira mak tau osan ba klube hodi investe iha futeból,” dehan Lexy.

Situasaun ne’ebé futeból hasoru iha mundu mak pandemia global Covid-19 maibé federasaun kada nasaun la taka matan ba klube sira nafatin fó subsídiu atu hamoris klube sira iha situasaun todan ne’e.

Nia dehan, buat hotu lao di’ak liu-liu futeból mak parte rua hanesan FFTL-LFTL tenke halakon ego hodi tuur hamutuk rezolve lakuna sira mosu iha laran.

Jornalista       : Hrotencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here